Virar Kavita Badla Case : विरार येथील कविता बाडला या तरुणीच्या हत्याप्रकरणात पाच जणांना जन्मठेपेची शिक्षा सुनावण्यात आली आहे. वसई सत्र न्यायालयाने जन्मठेपेची शिक्षा सुनावली असून यात एका महिलेचा देखील समावेश आहे.
१५ मे २०१६ रोजी विरार येथील कविता बाडला या नोकरी लावणाऱ्या कंपनीत काम करणाऱ्या तरुणीचे अपहरण करून तिची हत्या करण्यात आली. डहाणू येथील साखरा येथील परिसरात तिचा मृतदेह सुटकेसमध्ये टाकून जाळण्यात आला. या हत्या केल्यानंतर कविता बाडला हिच्या वडिलांकडून आरोपींनी ३० लाख रुपये आणि ३ किलो सोने खंडणी मागितली होती. १७ मे ला खंडणीची रक्कम स्वीकारताना पोलिसांनी हत्या प्रकरणातील मुख्य आरोपी मोहित कुमार भगत (वय २५) व त्याचे साथीदार राम अवतार शर्मा (वय २६), शिवकुमार शर्मा (वय २५), मनीष वीरेंद्र सिंग (वय ३६) आणि युनिता रवी (वय ३५) या अशा पाच जणांना अटक केली.
मित्राकडून आधी पत्नीवर अतिप्रसंग नंतर धमकी, संतापलेल्या पतीने मित्राला संपवलं; मृत्यूचा वेगळा बनाव रचला पण…
या प्रकरणात सरकारी वकील जयप्रकाश पाटील यांनी तक्रारदारांच्या बाजूने युक्तिवाद केला. तब्बल ५३ साक्षीदारांची पडताळणी केल्यानंतर या हत्या प्रकरणातील पाच आरोपींवरील आरोप सिद्ध झाले आहेत. नऊ वर्षानंतर या प्रकरणाचा निकाल लागला असून अपहरण करून खंडणी मागणे, हत्या करणे पुरावा नष्ट करणे या प्रकरणात चार जण दोषी आढळले आहेत. या प्रकरणातील आरोपींना जन्मठेप आणि ५ हजार रुपये दंड अशी शिक्षा वसई सत्र न्यायालयाने सुनावली आहे. या प्रकरणातील महिला आरोपी युनिता सिंग हिला जन्मठेप तसेच कलम ३८६ अंतर्गत ५ वर्ष व कलम २०१ अंतर्गत ३ वर्ष अशी शिक्षा न्यायमूर्ती एस. व्हीखोंगल यांनी सुनावली आहे. न्यायालयाने सुनावलेली शिक्षा सर्व आरोपींना एकत्रित भोगायची असून कविताच्या कुटुंबीयांना ६१ हजार रुपयांची नुकसान भरपाई देण्याचे आदेश देखील न्यायालयाने दिले आहेत.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड.… आणखी वाचा