Suresh Dhas Reacted on Walmik Karad MCOCA : संतोष देशमुख हत्येप्रकरणी सर्व आरोपींवर मकोका अंतर्गत कारवाई झाली आहे. यातच या हत्येचा सुत्रधार मानला जाणाऱ्या वाल्मिक कराडवर देखील अखेर मकोका लावण्यात आला आहे. दरम्यान सुरेश धसांनी हे प्रकरण लावून धरले आहे.
सुरेश धस म्हणाले, मी काय याप्रकरणी बोलायला ज्योतिषी नाही मात्र त्या परिसरात विचारलं तर काय काय घटना घडली त्याचा व्हिडिओ रेकॉर्ड झाला आहे. मी अगोदरच त्याबाबत सांगितलं होतं, तो पोलिसांनी संबंधित कंपनीकडून प्राप्त करून घेतला असेल. पण पुढे कायदेशीर कारवाई होईलच. आता माझ्याकडे पुरावे असायला मी काही जेम्स बाँड नाही, पुरावे पोलीस गोळा करत आहेत. महाराष्ट्राचे पोलीस आणि सीआयडी अधिकारी हे जेम्स बाँड पेक्षाही प्रभावी आहेत.
दरम्यान कराडांच्या पत्नी मंजिरी कराडांकडून सुरेश धस यांच्यावर आरोप करण्यात आला आहे. या आरोपांना प्रत्युत्तर देताना सुरेश धसांनी टीका केली आहे. धस म्हणाले, ते माझ्यावर काही आरोप लावू शकत नाहीत. त्यांना संविधानानं आंदोलन करण्याचा अधिकार दिला आहे. यापुढे जर कोणी कोणाची हत्या केली, तर त्याच्या बाजूने आंदोलन करण्याची नवीन प्रथाच महाराष्ट्रात पडेल, अशा शब्दांत त्यांनी सुनावले.
पुढे बोलताना धसांनी पुन्हा आक्रमक भूमिका घेतली आहे. ‘पोलिसांनी याप्रकरणी सगळं काही सापडलं आहे. कोणी धमकी दिली? कोणी उचलून आणायला सांगितलं? कोणी मारायला सांगितलं? या सर्व गोष्टींचे आका हे वाल्मिक कराडच आहेत हे आता सिद्ध झालं आहे. या प्रकरणात माझा लढा राष्ट्रपतींकडे माफीनामा पाठवला तरी चालूच राहणार. यामधील सर्वांना फाशीची शिक्षा व्हावी, यासाठी हा सुरेश धस प्रयत्न करणार,’ असे सुरेश धस म्हणाले.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड.… आणखी वाचा