Beed Agitation At Massajog Village Manoj Jarange: बीडच्या मस्साजोग येथे सध्या मोठ्या घडामोडी घडताना दिसत आहेत. येथे संतोष देशमुख यांचे भाऊ धनंजय देशमुख यांनी टाकीवर चढत आंदोलन केलं आहे. यावेळी मनोज जरांगेही या गावात पोहोचले असून त्यांनी धनंजय देशमुख यांना समजावण्याचा प्रयत्न केला.
मस्साजोग येथे आंदोलनाला सुरुवात झाली असून पाण्याच्या टाकीवर गावातील काही लोक टाकीवर चढून त्यांनी आंदोलन सुरू केलं. यामध्ये धनंजय देशमुखही होते. पाण्याच्या टाकीवर धनंजय देशमुख आंदोलन करताना दिसले.
धनंजय देशमुख हे आज सकाळपासून कुठे होते कोणालाच माहिती नव्हतं. सकाळपासून त्यांच्याशी संपर्क होत नव्हता. ते कुठे गेले, कोणाला माहित नव्हतं. त्यामुळे ते आंदोलनात येणार की नाही हेही कळत नव्हतं. पण, दुपारी पावणेबारा वाजताच्या सुमारास ते गावातील पाण्याच्या टाकीवर चढलेले दिसले.
गावकऱ्यांनी आणि धनंजय देशमुखांनी आंदोलनाचा इशारा दिल्याने मराठा आरक्षण आंदोलनाचे नेते मनोज जरांगे पाटीलही आज मस्साजोग येथे पोहोचले. धनंजय देशमुख यांना टाकीवर चढलेलं पाहून जरांगे यांनी हात जोडून त्यांना खाली येण्याची विनंती केली. जरांगे यांनी फोनवरुन धनंजय यांच्याशी संपर्क साधला.
जरांने धनंजय देशमुख यांना म्हणाले की, तुम्हाला काही झालं, तर मी यांचं जीण मुश्किल करेन. तुम्ही खाली या, तुमच्या कुटुंबाला तुमच्या आधाराची गरज आहे. सगळा समाज तुमच्या पाठिशी आहे, आपल्याला संतोष भय्याला न्याय मिळवून द्यायचा आहे. तुमच्या कुटुंबाला काही झालं तर मी यांचं जीण मुश्किल करेन, आत्महत्या करायची नाही, खाली या. जरांगे यांच्यासोबत बोलत असताना धनंजय देशमुख यांना अश्रू अनावर झाले. तर जरांगे यांच्याही डोळ्यात पाणी तरळलं होतं.
पोलीस प्रशासन देखील पाण्याच्या टाकी वरती पोहोचला आहे आणि ज्या महिला अधिकारी आहेत. त्या तिथे दाखल झाले आहेत आणि पाण्याच्या टाकीवरती जाऊन त्या विनंती करत आहेत की आपण खाली या. तर, ग्रामस्थांकडून सतत घोषणाबाजी केली जात आहे.
लेखकाबद्दलनुपूर उप्पलनुपूर उप्पल, महाराष्ट्र टाइम्स ऑनलाईन टीममध्ये डिजिटल कंटेंट प्रोड्युसर म्हणून कार्यरत आहेत, याआधी टीव्ही ९ मराठी, साम टीव्ही, इन मराठी वेबसाईटसाठी काम केलंय. डिजिटल पत्रकारिता क्षेत्रात ७ वर्षांचा अनुभव. राजकीय, सामाजिक लिखाणाची आवड. गुन्हेगारीसंबंधित, विज्ञानविषयक बातम्यांमध्ये हातखंडा… आणखी वाचा