लोकांचं श्रद्धास्थान असलेल्या अजमेर शरीफ दर्गा येथून परतत असताना पालघर तालुक्यातील भाविकांचा अपघात झाला. काळाने आपला डाव साधत पहाटेच या भक्तांचा अपघाती मृत्यु झाला. अपघाताची भीषणता एवढी होती की जागीच तरुणांनी आपला श्वास सोडला.

या बाबतची माहिती अशी की, राजस्थान राज्यातील सुप्रसिद्ध असलेल्या अजमेर शरीफ दर्गा येथे पालघर तालुक्यातील मनोर, पालघर परिसरातील मुख्यतः तरुण असलेले भाविक दर्शनासाठी गेले होते. अजमेर शरीफ दर्गा येथे दर्शन घेऊन सर्व भाविक पालघरच्या दिशेने परतीच्या प्रवासासाठी निघाले होते. गुजरात राज्यातील भरूच- अंकलेश्वर परिसरात या भाविकांवर काळाने घाला घातला आहे. भविक प्रवास करत असलेल्या अर्टिगा कार आणि ट्रकची धडक झाल्याने भीषण असा हा अपघात घडला आहे. बुधवारी पहाटे दोन वाजताच्या सुमारास हा अपघात घडला असून अपघात इतका भीषण होता की कार आणि ट्रकच्या धडकेत कारचा पूर्णतः चक्काचूर झाला आहे.

या भीषण अपघातात कारमधून प्रवास करणाऱ्या तीन तरुणांचा मृत्यू झाला आहे. आयान बाबा चोगले (रा. मनोर), ताहीर नासिर शेख (रा. पालघर) आणि मुदस्सर अन्सार पटेल (रा. टाकवहाळ) अशी या अपघातातील मृतकांची नावे आहेत. तर चारजण या भीषण अपघातात जखमी झाले असून सलमान अल्ताफ शेख, शाहरुख सलीम शेख, शादाब मलिक शेख आणि मोईन सलीम शेख (रा. काटाळे) अशी जखमींची आहेत. जखमींना उपचारासाठी भरूच परिसरातील खासगी रुग्णालयात दाखल करण्यात आले असून त्यांच्यावर उपचार सुरू आहेत. परतीच्या प्रवासात असताना तीन तरुणांचा अपघातात असा दुर्दैवी मृत्यू झाल्याने परिसरात सर्वत्र हळहळ व्यक्त होत आहे.