रक्षा जयेश शहा (वय ५५) व त्यांचे पती जयेश शशिकलाल शहा (वय ५८) असे मृत दाम्पत्याचे नाव आहे. त्यांच्या आत्महत्येचे गूढ कायम असून नातलगांकडे चौकशी करीत सरकारवाडा पोलिसांनी पुढील तपास सुरु केला आहे. मात्र ऐन लग्नाच्या तोंडावर वरमाय आणि वरपित्याने टोकाचे पाऊल उचलल्यामुळे परिसरात एकच खळबळ उडाली आहे. तर नवरदेवावर दुःखाचा डोंगर कोसळला आहे.

नेमकं काय घडलं?

सरकारवाडा पोलिसांनी दिलेल्या माहितीनुसार, रक्षा व जयेश यांनी रविवारी (दि. ५) रात्री अकरा वाजता राहत्या बंगल्यात विषारी औषध प्राशन केल्याचे त्यांच्या मुलाने बघितले. त्यांना तातडीने खासगी रुग्णालयात दाखल करण्यात आले. तेथून जिल्हा शासकीय रुग्णालयात पाठविल्यानंतर सोमवारी (दि. ६) पहाटे दोन वाजेच्या सुमारास वैद्यकीय अधिकाऱ्यांनी दोघांनाही मृत घोषित केले.
Dharashiv Crime : धाराशिवमध्ये रक्तरंजित सकाळ, पारधी समाजाच्या दोन गटात तुफान हाणामारी, चौघांचा मृत्यू

खोलीत चिठ्ठी नाही

सरकारवाडा पोलिसांनी दाम्पत्याच्या खोलीची तपासणी केल्यावर तिथे नियमित औषधांसह चष्मा व इतर साहित्य आढळले. संशयास्पद कोणतीही वस्तू किंवा आत्महत्येपूर्वीची चिठ्ठी सापडलेली नाही. नातलगांकडे पोलिसांनी चौकशी केली असून, आत्महत्येच्या कारणाचा उलगडा झालेला नाही.

दरम्यान, दाम्पत्याच्या पश्चात दोन मुले असून, त्यापैकी एक विवाहित आहे. मोठा मुलगा बांधकाम क्षेत्रात कार्यरत असून, धाकट्याचे २६ जानेवारी रोजी लग्न नियोजित आहे. त्याच्या लग्नानिमित्त रविवारी एका धार्मिक विधीसाठी त्यांचे नातलग एकत्र आले.
Torres Scam: ११ टक्के परताव्याचं आमिष, लोकांनी लाखो गुंतवले अन् टोरेसचं ऑफिस रातोरात बंद, शिवाजी पार्कला गुंतवणूकदारांचा ठिय्या

बंगल्यात नातेवाईक जमले, आईबापाने आयुष्य संपवलं

सुमारे वीस जणांनी बंगल्यात एकत्रित जेवण केले. त्यानंतर मोठा मुलगा कामानिमित्त घराबाहेर गेला व धाकटा देवदर्शनासाठी गेला होता. रात्री दहा वाजेच्या सुमारास रक्षा यांनी मोठ्या मुलाला फोन केला, तेव्हा त्यांचा आवाज हुंदका लागल्यासारखा येत होता, असा दावा नातलगांनी पोलिसांसमोर केला. तर काही वेळात मोठा मुलगा घरी पोहोचल्यानंतर त्याने आई वडिलांनी विषारी औषध प्राशन केल्याचे बघितले.