Dhule News: जिगर भिलचा मृतदेह त्याच्या शेतीपासून सुमारे २ किमी अंतरावर वनविभागाच्या क्षेत्रात आढळून आल्याने एवढ्या अंतरावर तो गेला कसा या बाबत उलटसुलट चर्चा सुरू आहे. मात्र सदर घटनेसंदर्भात पोलिसात अकस्मात मृत्यूची नोंद झाली असून यात हिंस्त्र प्राण्याच्या हल्ल्यात मृत्यू अशी नोंद करण्यात आली आहे.
साळवे ता.शिंदखेडा येथील १० वीत शिक्षण घेणाऱ्या १६ वर्षीय जिगर राजू भिल याचा मृतदेह आढळून आल्याने मोठी खळबळ उडाली. मयत जिगर भिलचा मृतदेह त्याच्या शेतीपासून सुमारे २ किमी अंतरावर वनविभागाच्या क्षेत्रात आढळून आल्याने एवढ्या अंतरावर तो गेला कसा या बाबत उलटसुलट चर्चा सुरू आहे. मात्र सदर घटनेसंदर्भात पोलिसात अकस्मात मृत्यूची नोंद झाली असून यात हिंस्त्र प्राण्याच्या हल्ल्यात मृत्यू अशी नोंद करण्यात आली आहे.
जिगर सकाळी ८ वाजता हरभरा पिकास पाणी देण्यासाठी आपल्या शेतात गेला होता. सकाळी साडेनऊच्या सुमारास वडील राजू भिल यांना वीजपंप सुरू झाल्याचे त्याने सांगितले. त्यानंतर ११ वाजेच्या सुमारास वरझाडी येथील पोलीस पाटील, राहुल पाटील यांना मेथी शिवारात इटावा डोंगराजवळील वन विभागाच्या हद्दीत १६-१७ वयाच्या मुलाचे प्रेत पडले असल्याची माहिती मिळाल्यानंतर ते तात्काळ घटनास्थळी पोहोचले होते. युवकाच्या मानेवर, पाठीवर, हिंस्र प्राण्यांच्या दातांच्या व नखांच्या खुणा असल्याची खबर मेथी येथील पोलीस पाटील नामदेव बैसाने यांनी शिंदखेडा पोलिसात दिली आहे. मयत जिगर यास आई, वडील, एक भाऊ, एक बहीण असा परिवार असून तो मोठा मुलगा होता.
यावेळी घटनास्थळी पोलिस उपविभागीय अधिकारी सुनील गोसावी, पोलीस निरीक्षक बाळासाहेब थोरात, सहाय्यक निरीक्षक हनुमंत गायकवाड, कलिंम पटेल, श्वान पथक व न्याय वैद्यक शास्त्रीय टीम तसेच वनविभागाचे सहाय्यक वनरक्षक योगेश सातपुते, वनक्षेत्रपाल मंगेश कांबळे, वनपाल नितीन मंडलिक, जगदीश पाटील आदी उपस्थित होते.
युवकाचा मृतदेह उत्तरीय तपासणीसाठी शिंदखेडा ग्रामीण रुग्णालयात दाखल करण्यात आला आहे. शवविच्छेदन अहवालानंतर युवकाच्या मृत्यूचे कारण स्पष्ट होईल, असे पोलिसांनी सांगितले.
लेखकाबद्दलअजय गर्दे महाराष्ट्र टाइम्स ऑनलाईनमध्ये धुळे जिल्ह्यात फ्रिलान्सर प्रतिनिधी म्हणून कार्यरत. 8 वर्षांपूर्वी वृत्तवाहिनीतून पत्रकारितेची सुरुवात. आवाज Tv चॅनल, सोबत मटा ऑनलाईनपर्यंत वाटचाल… आणखी वाचा