गडकरींकडून कामाची पहाणी

डिसेंबर २०२3 मध्ये विमानतळ प्राधिकरणाने रनवे कार्पेटिंगसाठी निविदा काढली होती. यानंतर १ मे २०२४ रोजी या कामाची वर्क ऑर्डर केजी गुप्ता कंपनीला देण्यात आली. मात्र, अद्याप धावपट्टीचे काम पूर्ण झालेले नाही. यासंदर्भात गडकरींकडे अनेक तक्रारी आल्या होत्या. याशिवाय धावपट्टीच्या कामामुळे नागपूर विमानतळावरील वाहतूक सकाळी १० ते सायंकाळी ६ वाजेपर्यंत बंद ठेवण्यात आली आहे. त्यामुळे विमान तिकिटांचे दरही दोन ते तीन पटीने वाढले आहेत. त्यामुळे नियमित विमान प्रवाशांना त्रास होत आहे. त्याची दखल घेत नितीन गडकरी यांनी सोमवारी धावपट्टीच्या कामाची पाहणी केली. यावेळी आमदार मोहन मते, विमानतळ सल्लागार समिती सदस्य गिरधारी मंत्री, प्रकाश भोयर, दिलीप जाधव, मिहानच्या व्यवस्थापकीय संचालक स्वाती पांडे, विमानतळ प्राधिकरणाचे अधिकारी आणि केजी गुप्ता कंपनीचे अधिकारी उपस्थित होते.

काम एक आठवड्यात होऊ शकले असते

गडकरी यांनी यावेळी नाराजी व्यक्त करत, “मुंबई-दिल्ली महामार्गाच्या १३७० किमीचा एक लाख कोटींचा प्रकल्प दोन वर्षांत पूर्ण केला, पण तीन किमीच्या रनवे साठी दीड वर्ष का लागतात?” असा सवाल केला. ते म्हणाले, “हे हास्यास्पद आहे आणि याचे उत्तर कंत्राटदारांना देणे आवश्यक आहे.” सर्वोच्च न्यायालयाच्या निर्णयामुळे रनवे रिकार्पेटिंगच्या कामाला वेळ लागल्याचे सांगण्यात आले. तसेच, कंत्राटदाराने पुरेशी मशिनरी वापरली असती तर हे काम एक आठवड्यात होऊ शकले असते, असे गडकरी यांनी स्पष्ट केले.

कामाच्या संथ गतीबद्दल गडकरींची नाराजी

कंपनीला मे २०२४ मध्ये वर्क ऑर्डर मिळाल्यानंतर जून ते सप्टेंबर २०२४ दरम्यान सर्वेक्षण करण्यात आले आणि अहवाल सादर करण्यात आला. प्रत्यक्ष काम १ ऑक्टोबर २०२४ पासून सुरू झाले. या काळात काही कारणास्तव काम बंद पडले. त्यानंतर २४ नोव्हेंबरला पुन्हा काम सुरू झाले. पहिल्या स्तराचे ८० टक्के काम पूर्ण झाले आहे. कंपनीने सांगितले की, दुसऱ्या आणि तिसऱ्या स्तराचे काम पूर्ण करण्यासाठी २१ मे २०२५ पर्यंत वेळ लागेल. धावपट्टीच्या कामाच्या संथ गतीबद्दल गडकरींनी तीव्र नाराजी व्यक्त केली.