Rahul Gandhi Will Visit to Parbhani: परभणीतील सोमनाथ सुर्यवंशीच्या मृत्यूनंतर आंबेडकरी समाजात संतापाची लाट उसळली आहे. पोलिसांच्या वागणुकीवर प्रश्नचिन्ह उपस्थित केला गेला. यातच अनेक राजकारण्यांनी येथे उपस्थिती लावत परिस्थितीचा आढावा घेतला आहे. आता लोकसभेचे विरोधी पक्षनेते राहुल गांधी देखील परभणी दौऱ्यावर येणार आहेत.
राहुल गांधी सोमवारी दुपारी विशेष विमानाने नांदेडात दाखल होणार आहेत आणि तेथून परभणीला जाऊन सोमनाथ सुर्यवंशी या मृत तरुणाच्या कुटुंबीयांची भेट घेणार आहेत आणि कुटुंबीयाचे सांत्वन करणार आहेत.
परभणीत गेल्या आठवड्यात रेल्वे स्टेशन परिसरात असणाऱ्या डॉ. बाबासाहेब आंबेडकरांच्या पुतळ्यासमोरील संविधानाच्या प्रतिकृतीची विटंबना झाली होती. सोपान पवार नावाच्या मानसिक रुग्णाने हे कृत्य केल्याचे समोर आले होते. यानंतर आंबेडकरी समाजात संतापाची लाट उसळली आणि जागोजागी निषेध आंदोलन छेडले गेले. ज्याला नंतर हिंसक वळण लागले. तर कडकडीच बंद देखील पुकारण्यात आला होता. ज्यामध्ये पोलिसांनी ३०० पेक्षा जास्त तरुणांवर गुन्हे दाखल केले. तर यातच वडार समाजाच्या ३५ वर्षीय आंदोलक सोमनाथ सुर्यवंशीला देखील पोलिसांनी अटक केली होती. पण अटकेच्या ७२ तासांनंतर सोमनाथ तुरुंगातच मृतावस्थेत आढळून आला. यानंतर एकच खळबळ उडाली होती.
विरोधी पक्षातही या घटनेनंतर संतापाची लाट उसळली. महाविकास आघाडीच्या सर्व घटक पक्षांनी सत्ताधारी महायुतीला घेरले आहे आणि कठोर कारवाईची मागणी केली आहे. ज्याचे पडसाद हिवाळी अधिवेशनातही उमटले आहेत.
महाराष्ट्र विधिमंडळात नागपुरात आणि बाहेर गदारोळ झाल्यानंतर मुख्यमंत्री देवेंद्र फडणवीस यांनी पीडित कुटुंबाला नुकसान भरपाईची घोषणा केली आहे. न्यायालयीन चौकशीचे आदेश दिले आणि प्रकरणाच्या खोलात जाण्यासाठी पोलिसांचे विशेष तपास पथक नेमले आहे.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड.… आणखी वाचा