विशेष म्हणजे सदर कंपनी सिडकोकडून दर महिन्याला कर्मचाऱ्यांच्या वेतनाची रक्कम उचलताना बिलासोबत कर्मचाऱ्यांचा पीएफ भरल्याचे चलन वेतन बिलासोबत जोडत असल्याने सिडकोचे अधिकारी देखील बुचकळ्यात पडले आहेत. त्यामुळे संबंधित कंपनी वेतन बिलासोबत बोगस चलन तर सादर करत नाही ना याचीही शहानिशा सिडको पुणे येथील पीएफ कार्यालयाकडून करणार असल्याचे सांगितले जात आहे. सदर कंपनी पुणे येथील नोंदणीकृत आहे. सिडको महामंडळास मंजूर असलेल्या एकूण पदांपैकी ६० टक्के पदे ही रिक्त असल्यामुळे अनेक कंपन्यांद्वारे सिडकोत मनुष्यबळ आऊटसोर्स केले जात आहे. या आऊटसोर्स कंपन्यांद्वारे सिडकोत कार्यरत असलेल्या कर्मचाऱ्यांना १५ ते २० हजार रुपये वेतन दिले जाते. कर्मचाऱ्यांच्या त्या वेतनातून पीएफची रक्कम कापून कंपनी त्या कर्मचाऱ्यांना वेतन अदा करते.
ग्राहक जात्यात, विकासक मोकाट! ‘रेरा नोंदणी’ घोटाळ्याची परिणती; महारेरा प्राधिकरण, महापालिकेवर टीका
दरम्यान, संबंधित कंपनी त्या कर्मचाऱ्यांच्या पीएफची रक्कम सिडकोकडून पुर्ण वसूल करुन सुध्दा पीएफ कार्यालयात जमा करत नसल्याची तक्रार सिडकोला प्राप्त झाली. सदर तक्रारीची दखल घेऊन कार्मिक विभागाने विशाल एक्सपर्ट या आऊटसोर्स कंपनीकडून स्पष्टीकरण मागविले आहे. दरम्यान दीड वर्षांपूर्वी देखील सिडकोत बोगस कर्मचारी वेतन घोटाळा उघडकीस आला होता. सिडकोचा तत्कालीन सहाय्यक कार्मिक अधिकारी सागर तपाडिया याने तब्बल २९ बोगस कर्मचारी सिडकोत कार्यरत असल्याचे दाखवून त्यांच्या नावे काढलेल्या सुमारे ३ कोटी रुपये वेतनाची रक्कम वेगवेगळ्या बँकेत जमा करुन ते परस्पर हडप केल्याचे चौकशीत आढळून आले आहे. त्यामुळे सागर तपाडिया विरोधात सिडकोने गुन्हा दाखल करुन त्यास बडतर्फ केले आहे.