Nandurbar Crime News: आजोबा वडिलांना सातत्याने अपमानास्पद वागणूक देत असल्याने अल्पवयीन नातवाने मित्राच्या मदतीने आजोबांचा काटा काढला आहे. हल्ल्यात आजोबांचा मृत्यू झाला आहे.
शहादा शहरातील शिरुड रस्त्यावर ८ डिसेंबरला रात्री नऊ वाजता ही घटना घडली आहे. याप्रकरणी पोलिसांनी चार तासांतच दोघा विधीसंघर्ष बालकांना अटक केली आहे. माहितीनुसार, ६० वर्षीय दशरथ शंकर राजे हे त्यांचा मोठा मुलगा भरत राजे हा राहत असलेल्या मीरा नगर येथील घरी जेवणासाठी गेले होते. जेवण करून दशरथ राजे तापी रेसिडेन्सी येथील आपल्या राहत्या घराकडे परतत असताना एका मुलाने त्यांना वाटेत गाठून आपल्या मित्राच्या मदतीने त्यांच्यावर चाकूने वार केले. यामध्ये दशरथ राजे गंभीर जखमी झाले. त्यानंतर दोघांनीही स्कुटीवरुन पळ काढला.
दरम्यान, रात्री नऊ वाजले तरी आपले वडील घरी परतले नसल्याचे समजताच दशरथ राजेंचा दुसरा मुलगा राहुल त्यांच्या शोधावर निघाला. मीरा नगरकडे जात असताना त्यांना शहादा शिरुड रस्त्यावरील गॅस गोडाऊन नजीक एक वृद्ध रस्त्यावर पडलेला दिसला. काही अपघात घडला असावा अशा शंकेने राहुलने तेथे जाऊन पाहिले असता ती व्यक्ती वडीलच असल्याचे समजताच त्याने आक्रोश केला. या घटनेची तात्काळ पोलिसांना माहिती देण्यात आली.
पोलिसांनी घटनास्थळी दाखल होत दशरथ राजेंना ग्रामीण रुग्णालयात उपचारासाठी दाखल केले. पण रुग्णालयात पोहोचताच वैद्यकीय अधिकाऱ्यांनी त्यांना मयत घोषित केले. पोलिसांनी या घटनेचा पुढील तपास सुरू केला आहे.
दरम्यान पोलीस कॉन्स्टेबल भरत उगले यांनाही काही गुप्त माहिती मिळाली होती. ती म्हणजे मयताच्या नातवानेच त्यांच्यावर हल्ला केला आहे. माहिती मिळताच पोलिसांच्या पथकाने परिसरातील सीसीटिव्ही फुटेज तपासण्यास सुरुवात केली. त्यात संशयित अल्पवयीन आरोपी व त्याचा मित्र हे खेतिया रोडच्या दिशेने जात असल्याचे दिसून आले. तपासादरम्यान अल्पवयीन आरोपी पोलिसांना मीरा नगर येथील राहत्या घरी आढळून आले. अवघ्या साडेचार तासात पोलिसांनी दोन्ही संशयितांना ताब्यात घेतले आहे.
संशयितांकडे कसून चौकशी केली असता त्यांनी आपला गुन्हा कबूल केला आहे. माझे आजोबा हे वडिलांना सातत्याने अपमानास्पद वागणूक देत असल्याने आपण त्यांचा खून केल्याचे अल्पवयीन नातवाने सांगितले. एका मित्राच्या साहाय्याने आपण स्कुटी म्हसावद रस्त्यावर लावली तर गुन्ह्यासाठी वापरण्यात आलेला चाकू एका मित्राच्या मदतीने भाऊतात्या पंपाच्या पुढे डोंगरगाव रस्त्यालगत लपाविल्याचेही त्याने सांगितले असल्याचे पोलीस अधिकाऱ्यांनी सांगितले. दोघा अल्पवयीन मुलांविरोधात गुन्हा दाखल करण्यात आला असून त्यांना उद्या न्यायालयात हजर केले जाणार असल्याचेही पोलिसांनी म्हटले.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड…. आणखी वाचा