यंदाच्या निवडणुकीत उत्तर महाराष्ट्रात सर्वाधिक जागा महायुतीला मिळाल्या आहेत. गेल्या वेळेस ३५ पैकी २७ जागांवर महायुतीचे आमदार होते. यंदा ही संख्या ३३ वर पोहचली आहे. त्यामुळे मंत्रिपदावर वर्णी लावण्यासाठी सरकारची कसोटी लागणार आहे. नाशिक जिल्ह्यातील १५ पैकी १४ आमदार महायुतीचे आहेत. नाशिककरांनी एकहाती महायुतीच्या बाजूने कौल दिला आहे. त्यामुळे नाशिककरांकडून आता महायुती सरकारकडून मंत्रिपदाबाबत अपेक्षा वाढल्या आहेत. गेल्या सरकारमध्ये नाशिकमध्ये शिवसेना शिंदे गटाकडून दादा भुसे, राष्ट्रवादी अजित पवार गटाकडून छगन भुजबळ यांना मंत्रिपद मिळाले होते.

शिंदे गटाचे दोन आमदार असतानाही एक मंत्रिपद मिळाले होते. परंतु, भाजपचे जिल्ह्यात पाच आमदार असतानाही एकही मंत्रिपद मिळाले नव्हते. चांदवडमध्ये डॉ. राहुल आहेर यांना निवडून दिल्यास मंत्रिपद दिले जाईल, असे आश्वासन प्रचारादरम्यान देवेंद्र फडणवीस यांनी दिले होते. त्यामुळे भाजपमध्ये यंदा डॉ. आहेर यांच्यासह सीमा हिरे, प्रा. देवयानी फरांदे, ॲड. राहुल ढिकले मंत्रिपदाच्या शर्यतीत आहेत. राष्ट्रवादीत भुजबळांसह अॅड. माणिकराव कोकाटे, नरहरी झिरवाळदेखील मंत्रिपदाच्या शर्यतीत आहेत. शिवसेनेकडून भुसेंसह सुहास कांदेकडूनही दावा केला जात आहे. त्यामुळे तीनही पक्षांकडून एकाला संधी मिळाल्यास जिल्ह्याला जळगावप्रमाणे तीन मंत्री मिळण्याची शक्यता आहे. नाशिकच्या पालकमंत्रिपदासाठी या नेत्यांनी आतापासूनच ‘फिल्डिंग’ लावण्यास सुरुवात केली आहे.

उत्तर महाराष्ट्रातील तीन जिल्ह्यांतूनही मंत्रिपदासाठी रस्सीखेच सुरू आहे. नंदुरबारमधून डॉ. विजयकुमार गावित गेल्या वेळेस मंत्री होते. त्यामुळे गावितही यांचाही मंत्रिपदासाठी दावा आहे. धुळ्यातून जयकुमार रावल यांनीही मंत्रिपदासाठी ‘फिल्डिंग’ लावली आहे. जळगावमधून गेल्या वेळेस गिरीश महाजन, अनिल पाटील आणि गुलाबराव पाटील या तिघांनी संधी मिळाली होती. नव्या सरकारमध्येही या तिघांना मंत्रिपदे मिळण्याची शक्यता आहे. परंतु, धक्कादायकरित्या नवीन नावेही समोर येण्याची शक्यता आहे.