राज्यात विधानसभा निवडणुकीत महायुतीला मोठे यश आले. 288 पैकी 235 जागांवर महायुतीने विजय मिळवला. असे असताना महाराष्ट्राच्या मुख्यमंत्रीपदासाठी रस्सीखेच सुरू झाली आहे. महायुतीतर्फे अद्याप मुख्यमंत्री नेमका कोण असणार आहे याबाबत घोषणा करण्यात आलेली नाही. असे असताना दोन दिवसांपूर्वी नंदुरबार मध्ये लाडक्या बहिणींचा लाडका मुख्यमंत्री देवाभाऊ असे 20 बाय 50 चे भले मोठे बॅनर फडकले होते. त्यानंतर जिल्हा भाजपा तर्फे नंदुरबार शहरातील श्री.गणपती मंदिरात देवेंद्र फडणवीस दुसऱ्यांदा मुख्यमंत्री व्हावे यासाठी महाआरतीचे आयोजन करण्यात आले होते. यावेळी गणपतीला साकडे घालण्यात आले.या महाआरतीवेळी जिल्हा सरचिटणीस सदानंद रघुवंशी, डॉ.सपना अग्रवाल, महेंद्र पटेल, प्रकाश चौधरी, श्याम राजपूत, भीमसिंह राजपूत, कैलास चौधरी, ॲड.उमा चौधरी,मनीषा निकम, सरिता चौधरी, दिव्या जोशी, पद्मा परदेशी व इतर पदाधिकारी मोठ्या संख्येने उपस्थित होते.
देवेंद्र फडणवीस पुन्हा एकदा मुख्यमंत्री व्हावे यासाठी श्री गणरायचरणी साकडे घातले. गणरायाच्या आशीर्वादाने हे स्वप्न साकार होईल असे भाजपा प्रदेश महामंत्री विजय चौधरी यांनी सांगितले.
कार्यकर्त्यांचा उत्साह पाहता राज्यात पुन्हा एकदा देवेंद्र फडणवीसांच नाणं वाजणार हे दिसून येत आहे.