पंतप्रधान नरेंद्र मोदी आणि गृहमंत्री अमित शहांनी सत्ता स्थापनेबद्दल निर्णय घ्यावा. त्याला आमचा पाठिंबा असेल. आमच्यामुळे त्यात कोणतीही बाधा येणार नाही. भाजप नेतृत्त्वानं महायुतीसाठी घेतलेला निर्णय आमच्यासाठी अंतिम असेल, असं शिंदे ठाण्यात घेतलेल्या पत्रकार परिषदेत म्हणाले. एकीकडे शिवसेनेचे नेते मुख्यमंत्रिपदासाठी प्रचंड आग्रही असताना दुसरीकडे शिंदेंनी मात्र भाजपचा निर्णय मान्य असेल, अशी भूमिका घेतली आहे.
महाविकास आघाडीत फूट? स्वबळाचा सूर टिपेला, नेत्यांचा दबाव वाढला; कोणता पक्ष बाहेर पडणार?
शिंदेंकडून काय अटी, शर्ती?
महायुतीत सत्ता स्थापनेबद्दल काही महत्त्वाचे निर्णय झाल्यानंतर शिंदेंनी पत्रकार परिषद घेतली, अशी माहिती सुत्रांनी दिली आहे. सत्ता स्थापनेच्या दृष्टीनं आज दिल्लीत महत्त्वाच्या गाठीभेटी झाल्या. राष्ट्रवादी काँग्रेसचे कार्यकारी अध्यक्ष प्रफुल पटेल, प्रदेशाध्यक्ष सुनील तटकरेंनी केंद्रीय मंत्री अमित शहांची भेट घेतली. शिंदेच्या खासदारांनीदेखील शहांची भेट घेतली.

सुत्रांनी दिलेल्या माहितीनुसार, शिवसेनेनं महायुतीच्या दुसऱ्या सरकारमध्ये गृह मंत्रिपदाची मागणी केली आहे. याआधीच्या सरकारमध्ये गृह विभाग उपमुख्यमंत्री देवेंद्र फडणवीस यांच्याकडे होता. २०१४ ते २०१९ या कालावधीत मुख्यमंत्री असतानाही फडणवीसांनी गृह विभाग स्वत:कडे ठेवला होता. गृहसह आणखी काही महत्त्वाची खाती शिवसेनेकडे मागण्यात आलेली आहेत.
मी काहीही ताणून धरलेलं नाही! अखेर शिंदेंनी मौन सोडले; मुख्यमंत्रिपदावरही स्पष्टच बोलले
आज घेतलेल्या पत्रकार परिषदेत शिंदेंनी अडीच वर्षांत महायुती सरकारनं केलेल्या कामांचा पाढा वाचला. आपल्या हातून चांगलं काम झालं, असं शिंदेंनी सांगितलं. याबद्दल त्यांनी मोदी, शहांचे आभार मानले. सुत्रांच्या माहितीनुसार, मुख्यमंत्रिपद सोडणाऱ्या शिवसेनेला महायुतीच्या नव्या सरकारमध्ये महत्त्वाची खाती मिळू शकतात. शिंदे मुख्यमंत्रिपदाच्या शर्यतीतून जवळपास बाहेर पडलेले आहेत. त्यामुळे नव्या सरकारमध्ये शिवसेनेला उपमुख्यमंत्रिपद मिळेल हे निश्चित आहे. या पदावर शिंदेंच्या निकटवर्तीय नेत्याची वर्णी लागू शकते.