भारतीय जनता पक्षासोबत जाऊनही, ‘ही राजकीय तडजोड आहे, वैचारिक नाही. आम्ही अजूनही फुले-शाहू-आंबेडकर यांची विचारधारा सोडलेली नाही. ‘बटेंगे तो कटेंगे’ हा भाजपचा नारा आम्हाला मान्य नाही’, असे अजित पवार यांनी ठामपणे सांगितले. ही भूमिका ते आवश्यक त्या व्यासपीठांवर सातत्याने मांडत राहिले. अजित पवार यांचा पक्ष केवळ ५५ जागा लढवत होता. असे असतानाही पाच जागांवर त्यांनी मुस्लिम उमेदवार दिले व त्यातले हसन मुश्रिफ आणि सना मलिक जिंकूनही आले. या सगळ्या मागे निवडणुकीसाठी ठरवलेली रणनीती व त्याबरहुकूम दिलेले उमेदवार आणि कार्यकत्यांनी केलेली चोख मेहनत हेच कारण आहे.
Eknath Shinde: आमचं काहीही ठरलं नव्हतं, मुख्यमंत्रिपदाबाबत एकनाथ शिंदेंचं मोठं वक्तव्य, पाहा काय म्हणाले?
अजित पवार हे अत्यंत मगरूर नेते आहेत, ते कुणाचाही अपमान करतात, त्यांनी सिंचन घोटाळ्यात ७० हजार कोटींचा भ्रष्टाचार केला आहे, त्यांच्या काकांनीच त्यांना राजकारणात बोट धरून चालायला शिकवले व त्यांच्याच पाठीत त्यांनी खंजीर खुपसला, आदी सगळे आरोप अजित पवार यांनी धुवून टाकले. लोकसभा निवडणुकीत त्यांनी व त्यांच्या पक्षातील काही नेत्यांनी शरद पवार यांच्यावर चढवलेल्या वैयक्तिक हल्ल्यांमुळे जनतेने दर्शवलेली नाराजी महागात पडली. त्यातून अजित पवार यांनी धडा घेतला आणि या निवडणुकीत त्यांनी पवार यांच्यावर वैयक्तिक टीका करणे टाळले. उलट दुसऱ्या बाजूला शरद पवार यांनी अजित पवार व त्यांच्या साथीदारांवर वैयक्तिक हल्ले चढवले. ते दिलीप वळसे पाटलांना गद्दार म्हणाले. अजितपवारांच्या तर हातातच खंजीर चिकटवलेला आहे, असे वातावरण पवार व त्यांच्या शिष्यांनी तयार केले होते. खरेतर हाच खंजीर अनेक वर्षे वसंतदादांच्या बाबतीत पवारांनी वापरल्याचा आरोप होत असे. मात्र या आरोपाला जनता धुडकावून लावत होती. त्याचाच विसर पवार यांच्या राष्ट्रवादी काँग्रेसला पडत होता. शरद पवारांच्या वारंवार कानाला लागणारे काही नेते तर मुद्दामहून अजित पवारांवर तुटून पडत होते. हे सगळे होत असताना आधीच आपापल्या मतदारसंघात तगडे नेते असलेले अजित पवार यांचे आमदार कामाला लागले होते. कारण लोकसभेच्या अनुभवानंतर अजित पवार यांनी आपल्या प्रत्येक आमदाराला विकासकामांसाठी केवळ निधीच दिला नाही, तर प्रत्येक आमदाराला निवडणूक गांभीर्याने घेतली नाही, तर पराभव निश्चित आहे, याचीही जाणीव करून दिली होती. त्याचा मोठा फायदा पक्षाला झाल्याचे दिसत आहे.

आपल्यासोबत असलेल्या पूर्वीच्या जनाधारातील जी मते लोकसभेला दूर गेली होती, ती पुन्हा परत आणण्यासाठीही रणनीती ठरवली गेली. गाव पातळीवर, अगदी गल्ली-बोळांत बैठका घेऊन त्यातील प्रश्न मार्गी लावा व जे लागणार नाहीत त्यांची माहिती मुख्यालयात येऊन द्या, आदी अनेक आदेशांचे तंतोतंत पालन राष्ट्रवादीचे उमेदवार व कार्यकत्यांनी केले. त्यामुळेच भाजपसोबत आघाडीत असूनही मराठा आणि मुस्लिम या दोन्ही समजांची मते त्यांच्या राष्ट्रवादीला मिळाली व दणदणीत ‘स्ट्राइक रेट’ सह त्यांनी शरद पवारांना मात दिली, हे स्पष्ट आहे.