विधानसभा निवडणुकीसाठी 20 नोव्हेंबर रोजी मतदान प्रक्रिया पार पाडली असून ईव्हीएम घेऊन गेलेल्या एका बसच्या सीटखाली गुरुवारी संध्याकाळी 500 रुपयांच्या नोटांचे दोन बंडल विद्यार्थ्यांना दिसून आले. विद्यार्थ्यांनी ते नोटांचे बंडल एसटी बसच्या वाहक सविता मनोज आडांगळे यांच्याकडे सुपूर्द केले. प्रशासनाने निवडणूक कामासाठी वापरलेल्या एसटी बसमध्ये मतदानाच्या दुसऱ्या दिवशीच मोठी रक्कम मिळून आल्याने उलट सुलट चर्चेला उधाण आले आहे. कोपरगाव आगाराची बस MH 40 Y 5679 या क्रमांकाची बस स्ट्रॉंग रूम पासून ईव्हीएम आणि कर्मचाऱ्यांना घेऊन मतदान केंद्रापर्यंत जाऊन आली. त्यानंतर त्याच बसने गुरुवारी वैजापूर कोपरगाव बस फेऱ्या केल्या. त्यानंतर गुरुवारी संध्याकाळी संजीवनी इंग्लिश मीडियम स्कूल येथून विद्यार्थ्यांना घेऊन बस धामोरीच्या दिशेने जात असताना बसच्या शेवटच्या सीटाखाली प्रवास करणाऱ्या विद्यार्थ्यांना पाचशे रुपयांच्या नोटांचे दोन बंडल मिळून आले. साईराज कदम नावाच्या विद्यार्थ्याने तसेच त्याच्या सहकाऱ्यांनी बसमधील संजीवनी इंग्लिश मीडियम कर्मचारी रोहित होन आणि सचिन भालके यांच्याकडे दिली. त्यांनी ते नोटांचे बंडल महिला वाहक सविता अडांगळे यांच्याकडे दिली. सविता अडांगळे यांनी बस डेपो मॅनेजर अमोल बनकर यांनाही माहिती देऊन ती रक्कम बस डेपोत नेऊन मोजून जमा केली असून ती रक्कम 86 हजार पाचशे रुपये असल्याची माहिती देण्यात आली आहे. संजीवनी इंग्लिश मीडियम स्कूलचे विद्यार्थी तेथे काम करणारे कर्मचारी तसेच महिला वाहकाने प्रामाणिकपणा दाखवत सदरची रक्कम जमा केल्याने त्यांचे सर्व स्तरातून कौतुक होत आहे. विद्यार्थ्यांनी इतकी मोठी रक्कम प्रामाणिकपणे परत केल्याने सदरची रक्कम कुणाची आहे. बसच्या सीटाखाली कोणी ठेवली? असे अनेक प्रश्न उपस्थित होत आहे.