सदानंद थरवळ यांनी पत्रात लिहिले की, शिवसेना या चार अक्षरी मंत्राने झपाटलेला मी तुमचा आणि दिघेसाहेबांच्या ठाणे जिल्ह्यातला कट्टर शिवसैनिक असून या युतीचा भाग असलेल्या शिवसेनेचा कार्यकर्ता म्हणून आम्हांस भाजप आणि राष्ट्रीय स्वयंसेवक संघाबरोबर जवळून काम करण्याची संधी मिळाली. बारा वर्षांपूर्वी तुम्ही आमच्यातून कायमचे निघून गेलात तेव्हा तुमच्या पवित्र स्मृतीला वंदन करण्यासाठी लोटलेल्या लाखो शिवसैनिकातला मी एक शिवसैनिक असल्याचे थरवळ यांनी पत्रात नमूद केले आहे. ते पुढे लिहितात की तुम्हाला भावपूर्ण श्रद्धांजली देणारे त्या दिवशीचे फलक मला आजही डोळ्यासमोर येतात…. “श्वासाची माळ तुटली…ध्यासाची नव्हे…” साहेब शिवसेनेचा आणि… तुमचा ध्यास घेतलेली आमची कट्टर शिवसैनिकांची पिढी असल्याच्या भावना त्यांनी आपल्या पत्रातून व्यक्त केल्या. ८० टक्के समाजकारण करणाऱ्या आमच्यासारख्या शिवसैनिकांऐवजी आता १०० टक्के अर्थकारण आणि राजकारण करणाऱ्यांना प्राधान्य दिले जात असल्याची खंत थरवळ यांच्यासारख्या जेष्ठ शिवसैनिकाने व्यक्त केल्याने समाज माध्यमांवर या पत्राची चर्चा रंगली आहे.
संभाजी भिडे नावाच्या गटार गंगेत तुमच्या मुलांना जाऊ देऊ नका; सरोज पाटलांचा हल्लाबोल, मुश्रीफांना सोडले नाही
ते पुढे लिहितात की, आमच्यासारखी सर्वसामान्य माणसं आशेवर जगतात. शिवसैनिक ते जिल्हाप्रमुख अशी ४४ वर्षे संघटनेसाठी दिली. पण आज जेव्हा डोंबिवलीचं विधानसभेत प्रतिनिधित्व करण्याची संधी आली तेव्हा एकनिष्ठपणा, संघटनेतील काम, सामाजिक कार्य यावर स्वार्थी राजकारण आणि पैसा सरस ठरलं याबद्दल त्यांनी स्पष्टपणे नाराजी व्यक्त केली तेव्हा त्यांचा थेट रोख शिवसेनेच्या वरिष्ठ नेतृत्वावर होता.

दीपेश म्हात्रे यांच्याबाबत अप्रत्यक्षपणे थरवळ लिहितात की, डोंबिवलीकरांनी या प्रवृत्तीला पूर्वीच चारी मुंड्या चितपट केले आहे. याचाही वरिष्ठांना विसर पडला. त्याचबरोबर डोंबिवलीच्या सुसंस्कृत समाजव्यवस्थेत म्हात्रे अयोग्य असल्याचे अप्रत्यक्ष संकेत देताना सांस्कृतिक प्रतिमा जपणारा आणि विकासनिधी आणण्याची क्षमता असणारा विद्यमान आमदार रविंद्र चव्हाण यांनाच आपला पाठिंबा असल्याचे त्यांनी या पत्राद्वारे जाहीरच केले. थरवळ आणि चव्हाण दोघेही कोकणातील पार्श्वभूमीवर असून त्यांनी अनेक वर्षे डोंबिवलीत युतीसाठी एकत्र काम केले आहे.

सोयीनुसार तीन-चार वेळा विचारधारा बदलणारे सदैव स्वार्थातच मशगुल असतात असा टोलाही उबाठाचे उमेदवार म्हात्रे यांना थरवळ यांनी लगावला. “साहेब, परत या” अशा १२ वर्षांपूर्वी बाळासाहेबांच्या अंतयात्रेतील फलकांची त्यांनी आठवण करून जेष्ठ शिवसैनिकांना एक प्रकारे भावनिक साद घातली, त्यामुळे म्हात्रे यांची अवस्था बुडत्याचा पाय खोलात झाल्याची चर्चा राजकीय वर्तुळात होताना दिसत आहे.