मुंबई : महाविकास आघाडीच्या पत्रकार परिषदेत उत्तर मुंबई लोकसभेची जागा काँग्रेस लढवणार असल्याचे जाहीर होताच पक्ष ‘कामाला’ लागला. शिवसेना (उद्धव बाळासाहेब ठाकरे) पक्षाचे माजी आमदार आणि उत्तर मुंबई मतदारसंघाचे संभाव्य उमेदवार मानले जाणारे विनोद घोसाळकर यांना काँग्रेसने ऑफर दिली होती. घोसाळकरांनी काँग्रेसच्या तिकिटावर उत्तर मुंबई लोकसभा मतदारसंघातून निवडणूक लढवावी, असा प्रस्ताव पाठवल्याची माहिती आहे. परंतु घोसाळकरांनी काँग्रेसची विनंती धुडकावली. संजय राऊत यांनीही घोसाळकर काँग्रेसच्या चिन्हावर लढणार नसल्याचं स्पष्ट केलं.

“महाविकास आघाडीच्या जागावाटपात उत्तर मुंबई लोकसभेची सीट काँग्रेसकडे गेली आहे. या जागेवरुन शिवसेना (ठाकरे गट) लढली, तर इंडिया आघाडीला एक जागा मिळेल, अशी जनभावना आहे. मी चांगला उमेदवार ठरुन भाजपच्या पियुष गोयल यांना चांगली लढत देऊ शकतो, अशी चर्चा काँग्रेस पदाधिकाऱ्यांमध्ये स्थानिक पातळीवर सुरू होती.” असं विनोद घोसाळकर म्हणाले.
अन्याय होणार नाही, पुनर्वसन करु, भावना गवळींची समजूत काढण्याचा प्रयत्न, उदय सामंतांची शिष्टाई निष्फळ
“अंतिम निर्णय उद्धव ठाकरे आणि काँग्रेस नेतृत्व घेतील. काँग्रेस प्रदेशाध्यक्ष नाना पटोले यांनी मला उत्तर मुंबईतून काँग्रेसच्या तिकीटावर आणि हाताच्या चिन्हावर निवडणूक लढवण्यास सांगितले, परंतु मी त्यांना सांगितले की मी शिवसैनिक म्हणून काम करत आहे आणि मी फक्त या लोकसभेसाठी इतर कोणत्याही पक्षातून लढू शकत नाही.” असंही घोसाळकर म्हणाले.

बुधवारी शिवसेनेच्या (ठाकरे गट) कार्यकर्त्यांनी काँग्रेस शहराध्यक्ष वर्षा गायकवाड यांची भेट घेतली. काँग्रेसने उत्तर मुंबईची जागा ठाकरेंना सोडण्याची मागणी केली. काँग्रेस कार्यकर्त्यांनी सांगितले की त्यांना उत्तर मुंबईची जागा ही ठाकरेंकडील दक्षिण मध्य मुंबईसोबत अदलाबदल करण्याची इच्छा आहे.
शिवतारेंना कोणाचा फोन? प्रश्नावर अजितदादांचा पारा चढला, तुम्ही मला मूर्ख समजू नका, मी सांगायचं…
ठाकरे गट या प्रस्तावावर सहमत होण्याची शक्यता नाही, कारण त्यांनी आधीच अनिल देसाई यांना दक्षिण मध्य मुंबईमधून उमेदवार म्हणून घोषित केले आहे. पक्षाच्या सूत्रांनी सांगितले की वर्षा गायकवाड उद्धव ठाकरे यांची भेट घेणार होत्या, परंतु आता ती भेट या आठवड्याच्या अखेरीस होण्याची चिन्हं आहेत.

बुधवारी होणारी काँग्रेस नेत्यांची बैठक पुढे ढकलण्यात आली. पक्षातील सूत्रांनी सांगितले की काँग्रेसचे अनेक सदस्य नाराज होते की पक्षाला मुंबई शहरातील सहापैकी फक्त दोन जागा दिल्या गेल्या, ज्यामध्ये उत्तर मुंबईचा समावेश आहे, जी मविआला जिंकण्यासाठी सर्वात कठीण जागा मानली जाते.

विनोद घोसाळकर गेल्या काही दिवसात कठीण काळाचा सामना करत आहेत. त्यांचे सुपुत्र माजी नगरसेवक अभिषेक घोसाळकर यांना फेसबुक लाईव्हदरम्यान गोळी मारण्यात आली. त्यानंतर आरोपी मॉरिस नोरोन्हाने स्वत:वर गोळी झाडून घेतली.
Read Latest Maharashtra News Updates And Marathi News

विनोद घोसाळकर यांनी 2009 ते 2014 या काळात दहिसर मतदारसंघाचे विधानसभेत प्रतिनिधित्व केले. त्यापूर्वी त्यांनी नगरसेवक म्हणून काम पाहिले. त्यांचा मुलगा अभिषेक आणि सून तेजस्वी हे दोघेही नगरसेवक होते. मुंबई उत्तर लोकसभा मतदारसंघात दहिसर, मागाठाणे, बोरिवली, कांदिवली पूर्व, मालाड पश्चिम आणि चारकोप विधानसभा क्षेत्रांचा समावेश आहे.