फडणवीस यांनी आपल्या भाषणातून जानकर यांचे मुक्तकंठाने कौतुक केले. परभणी लोकसभा मतदारसंघातून राष्ट्रीय समाज पक्षाचे राष्ट्रीय अध्यक्ष महादेवराव जानकर यांना महायुतीने महाराष्ट्राचे हित डोळ्यासमोर ठेवून निवडणूक रिंगणात उतरवले आहे. जानकर यांच्यासारख्या गोर-गरिब, वंचित व बहुजन समाजासाठी अहोरात्र काबाडकष्ट करणार्या सामान्य फाटक्या परंतु, उच्चशिक्षित, विकासाभिमुख व्यक्तिमत्वास महायुतीच्या नेतेमंडळींसह कार्यकर्त्यांनी व सामान्य परभणीकरांनी प्रचंड मताधिक्यांनी लोकसभेवर पाठवावे, असे आवाहन राज्याचे उपमुख्यमंत्री देवेंद्र फडणवीस यांनी परभणीत केले. जानकरांना मत म्हणजेच थेट मोदींना मत आहे, असे लक्षात ठेवा, असेही ते म्हटले.
जानकर म्हणजे मूर्ती लहान किर्ती महान असे हे व्यक्तिमत्व आहे. ते आपल्या मंत्रिमंडळात कॅबिनेट मंत्री होते. परंतु कुठेही कुरकुर नाही, कुठेही कुरबुर नाही. आपल्या खात्याचे काम जानकर यांनी नेटाने केले, मंत्रिपदाच्या कारकीर्दीत एक रुपयांचा डागसुध्दा जानकर यांना कधी लागला नाही. फाटका मंत्री म्हणून ते परिचित होते. आजही फाटका माणूस म्हणून ते सर्वदूर परिचित आहेत. विशेषतः सर्वसामान्य व्यक्तींच्या मनात त्यांच्या विषयीची आस्था, प्रेम हेच जानकर यांची श्रीमंती आहे, असे फडणवीस म्हणाले.
आपण उपमुख्यमंत्री अजित पवार यांचे खूप आभारी आहोत. परभणी मतदारसंघ राष्ट्रवादीच्या हिश्श्यास असताना सुध्दा जानकर यांच्यासाठी पवार यांनी एका क्षणात मतदारसंघ सोडून दिला. जानकर यांच्या पाठीशी सवार्थाने ताकद उभी केली. आता राष्ट्रवादीच नव्हे, महायुतीच्या प्रत्येक लोकप्रतिनिधींसह, पदाधिकारी व कार्यकर्त्याची एकच जबाबदारी आहे, ती म्हणजे मोदी यांच्या पाठीशी मोठी ताकद उभी करण्याकरीता जानकर यांना रेकॉर्डब्रेक मतांनी निवडणून आणणे, हे क्रमप्राप्त आहे. त्यात महायुतीच्या मंडळींनी कोणत्याही प्रकारची कुचराई करु नये, जानकरांना वोट म्हणजेच मोदींना वोट आहे, हा संदेश घराघरापर्यंत पोहोचवावा, असे आवाहन फडणवीस यांनी केले.
जानकर हे या मतदारसंघात भिंगरी लावून फिरतीलच, परंतु महायुतीच्या मंडळींनी कोणत्याही प्रकारचा राग-लोभ, मान-सन्मान, रुसवे-फुगवे वगैरे गोष्टींचा बावू न करता स्वतः नियोजन करीत या निवडणुकीच्या प्रचारयुध्दांत जुंपावे जानकर यांना लोकसभेत मोठ्या सन्मानाने पाठवावे, असेही आवाहन केले.