म. टा. प्रतिनिधी, नागपूर: धावत्या ऑटोत विद्यार्थिनीशी अश्लील चाळे करणाऱ्या युवकाला पकडून नागरिकांनी चांगलाच चोप देत अजनी पोलिसांच्या स्वाधीन केले. पोलिसांनी विनयभंगासह विविध कलमान्वये गुन्हा दाखल करून युवकाला अटक केली.कुणाल अनिल लोंदे (वय ३२, रा. विद्यानगर, नंदनवन) असे अटकेतील युवकाचे नाव आहे. तो एका खासगी कंपनीत काम करतो. २०वर्षीय विद्यार्थिनी अभियांत्रिकीच्या अभ्यासक्रमाला आहे. ती अजनी पोलिस ठाण्याच्या हद्दीत राहते. ऑटोने कॉलेजमधून घरी ये-जा करते. जानेवारीत ऑटोने ती घरी यायला निघाली. यावेळी कुणालही ऑटोत बसला. त्याने तिची छेड काढली. विद्यार्थिनीने याकडे दुर्लक्ष केले. त्यानंतर काही दिवसांनी तो पुन्हा ऑटोत बसला व विद्यार्थिनीशी अश्लील चाळे केले. विद्यार्थिनीने नातेवाइकांना माहिती दिली. ‘यानंतर तो ऑटोत बसल्यास सांग’, असे नातेवाईक तिला म्हणाले.
शुक्रवारी सायंकाळी विद्यार्थिनी ऑटोने घरी यायला निघाली. कुणालही ऑटोत बसला. त्याने विद्यार्थिनीची छेड काढायला सुरुवात केली. विद्यार्थिनीने नातेवाइकांना व्हॉट्सअॅपवर माहिती दिली. तिचे नातेवाईक मानेवाडा चौकात पोहोचले. तेथे ऑटो थांबताच नातेवाईक पोहोचले. नातेवाइकांना बघताच कुणाल पळायला लागला. नातेवाइकांनी पाठलाग सुरू केला. नागरिकांनी कुणालला पकडले व चोप द्यायला सुरुवात केली. याबाबत माहिती मिळताच अजनी पोलिस ठाण्याचे वरिष्ठ पोलिस निरीक्षक गजानन चामटे, उपनिरीक्षक पंकज बावने यांच्यासह पोलिसांचा ताफा तेथे पोहोचला. पोलिसांनी नागरिकांच्या तावडीतून कुणालची सुटका केल्याने अनर्थ टळला. पोलिसांनी गुन्हा दाखल करून कुणालला अटक केली.