सोलापूर: सोलापूर शहरात सकल मराठा समाजाची बैठक संपन्न झाली. आगामी लोकसभा निवडणुकीत मराठा समाजातील उमेदवार अर्ज दाखल करणार असल्याची माहिती माऊली पवार यांनी माध्यमांसमोर बोलताना दिली. सोलापूर लोकसभा मतदारसंघात भाजप उमेदवार राम सातपुते आणि काँग्रेसच्या उमेदवार प्रणिती शिंदेना घाम फोडणार असल्याचंही त्यांनी सांगितलं.

सोलापूर लोकसभा मतदारसंघ हा अनुसूचित जातीसाठी राखीव असल्याने मराठा समाज राखीव उमेदवारांना निवडणुकीच्या रिंगणात उभं करणार आहे. पंढरपूर येथील मराठा समाजाचे तीन उमेदवार थेट वाराणसी मतदारसंघातून उमेदवारी अर्ज भरून नरेंद्र मोदी यांना आवाहन देणार असल्याची माहिती सकल मराठा समाजाचे समनव्यक माऊली पवार यांनी दिली.

पंधरा जणांनी मराठा समाजाकडून खासदारकी लढण्याची इच्छा व्यक्त केली

शुक्रवारी रात्री छत्रपती शिवाजी महाराज शाळेत सकल मराठा समाजाची बैठक संपन्न झाली. अनुसूचित जाती प्रवर्गातील पंधरा दलित बांधवानी मराठा समाजातर्फे प्रणिती शिंदे आणि राम सातपुते यांच्या विरोधात उमेदवारी अर्ज भरण्यासाठी इच्छा व्यक्त केली आहे. पंधरा जणांमधून एकाची निवड होऊन त्या उमेदवाराला मराठा समाज संपूर्ण पाठिंबा देणार आहे.

प्रणिती शिंदे आणि राम सातपुते यांच्या विरोधात मराठा समाज अर्ज दाखल केल्यास डोकेदुखी वाढणार आहे. माढा मतदारसंघ हा खुल्या प्रवर्गासाठी असल्याने इच्छुकांची गर्दी वाढली आहे. मराठा समाजातील जवळपास २९ अर्ज माढ्यासाठी आले आहेत. धैर्यशील मोहिते पाटील यांनी देखील अर्ज केला तर त्यांना मराठा समाज संपूर्ण पाठिंबा देईल अशी माहिती माऊली पवार यांनी दिली आहे.

वाराणसी मतदार संघांतून मराठा उमेदवार देऊन मोदींना देखील आवाहन देणार

सकल मराठा समाजाची यापूर्वी शासकीय विश्रामगृहात १० मार्च रोजी बैठक झाली होती. बैठकीत पंतप्रधान नरेंद्र मोदीच्या विरोधात मराठा समाज उमेदवार देणार असल्याची जाहीर घोषणा करण्यात आली होती. त्याबाबत बोलताना माऊली पवार यांनी पुन्हा एकदा स्पष्ट केले आहे, पंढरपूर येथील मराठा समाजातील तीन मराठा बांधव थेट वाराणसी मतदार संघात जाऊन उमेदवारी अर्ज दाखल करणार आहेत.