म. टा. प्रतिनिधी, नागपूर : ऐन लग्नसराईच्या मौसमात खाद्यतेलाच्या दरांमध्ये चढउतार दिसून येत आहेत. मागील काही महिन्यांचा विचार करता खाद्यतेलाच्या दरात वाढ झाल्याने सामान्यांचे ‘तेल’ निघत असल्याचे चित्र आहे.

खाद्यतेल हा सर्वांच्याच रोजच्या जगण्यातील अविभाज्य असा घटक आहे. भाजीला फोडणी देणे असो वा डाळीला तडका, खाद्यतेलाशिवाय पर्याय नसतो. घरात कुठलाही सणवार वा छोटा-मोठा उत्सव वा समारंभ असल्यास खाद्यतेलाद्वारे बनविण्यात येणारे चमचमीत पदार्थ जेवणाची लज्जत वाढवित असतात. सध्या लग्नसराईचा माहौल सुरू असून याच काळात खाद्यतेलाचे दर वाढले आहेत. सोयाबीन हे खाद्यतेल म्हणून वापरणाऱ्यांची संख्या सर्वाधिक आहे. त्यापाठोपाठ शेंगदाणा, सनफ्लॉवर, राइस ब्रान यांचा समावेश आहे. वाढलेल्या खाद्यतेलांच्या दराबाबत अधिक सांगताना ठोक खाद्यतेल विक्रेता नंदू येनुरकर म्हणाले,‘शेंगदाण्याचा पंधरा लिटरचा डबा २४६० रुपयांवरून २५२० रुपयांवर पोहचला आहे.

सोयाबीनचा डबा १८२० रुपयांवरून १७२० रुपयांवर गेला आहे. तर सनफ्लॉवरचा पंधरा लिटरचा डबा १६५० रुपयांवरून १७२० आणि राइस ब्रानचा डबा १५५० हून १६५० वर गेला आहे. खाद्यतेलांच्या दरांमध्ये आठवड्याभराच्या आत चढउतार दिसून आले आहेत. विशेषत: चार ते पाच दिवसांपूर्वी दरांमध्ये वाढ होऊन आता काहीशी घट झाली आहे. तरीदेखील हे दर तुलेनेने ग्राहकांची चिंता वाढविणारे आहेत. मुख्य म्हणजे एप्रिल आणि मे हे दोन महिने लग्नाच्या दृष्टीने महत्त्वाचे असल्यामुळे खाद्यतेलाचे वाढते दर त्रासदायक ठरत आहेत.’ व्यापाऱ्यांनी दिलेल्या माहितीनुसार, सध्या काही दिवस खाद्यतेलाचे दर वाढणार नाहीत. येत्या काळातील निवडणुका पाहता दरांमध्ये स्थिरता राहणार आहे.

असे आहेत दर
शेंगदाणा-२५२०
सोयाबीन-१६८०
सनफ्लॉवर-१७२०
राइस ब्रान-१६५०