कल्याण: मुख्यमंत्री एकनाथ शिंदे यांचे सुपुत्र खासदार श्रीकांत शिंदे यांचा मतदार संघ असलेल्या कल्याण लोकसभा मतदार संघावर संपूर्ण राज्याचं लक्ष लागून आहे. येत्या लोकसभा निवडणुकीसाठी महायुतीकडून खासदार श्रीकांत शिंदे यांचे नाव निश्चित झाले आहे. फक्त अधिकृत घोषणा बाकी आहे. तर दुसरीकडे महाविकास आघाडीकडून ही जागा ठाकरे गटाकडे आहे. मात्र ठाकरे गटाचा उमेदवार अद्याप निश्चित झालेला नाही.
ठाकरे गटाकडून आदित्य ठाकरे, सुषमा अंधारे, वरुण सरदेसाई यांच्या पाठोपाठ आता केदार दिघे यांचे नावदेखील कल्याणसाठी चर्चेत आले आहे. केदार दिघे हे शिवसेनेचे दिवंगत नेते धर्मवीर आनंद दिघे यांचे पुतणे आहेत. ठाकरे गटाचे ठाणे लोकसभा जिल्हाप्रमुख आहेत. त्यामुळे दिघे कार्ड वापरून श्रीकांत शिंदे यांची घोडदौड थोपवण्याचा डाव ठाकरे गटाने टाकल्याची चर्चा आता जोर धरू लागली आहे.
राज्यात २३ खासदार; भाजपकडून २२ जागांवर उमेदवार; एका मतदारसंघात अडतंय; काय घडतंय?
यावर प्रतिक्रिया देताना केदार दिघे यांनी पक्षात इच्छा अपेक्षेपेक्षा आदेश महत्वाचा असतो. अद्याप तरी असा आदेश किंवा सूचना आपल्याला देण्यात आलेल्या नाहीत. चर्चा सुरू असल्याचे मलाही माहीत आहे. मात्र वरिष्ठांकडून असा कोणताही आदेश नाही. पण जर संधी मिळाली तर नक्कीच लोकसभा लढवणार असल्याचे दिघे यांनी सांगितले.
शिवसेनेत उभी फूट पडल्यानंतर होणाऱ्या लोकसभा निवडणुकीत कल्याण लोकसभा मतदारसंघ प्रतिष्ठेचा बनला आहे. या मतदार संघात एकीकडे पूर्वीपेक्षा जास्त मतांनी तिसऱ्यांदा निवडून येण्याचा चंग कल्याणचे विद्यमान खासदार डॉक्टर श्रीकांत शिंदे यांनी बांधला असतानाच दुसरीकडे डॉक्टर शिंदे यांचे विरोधक कोण? या चर्चेला पूर्णविराम मिळण्याचे चिन्ह दिसत नाही.
लोकसभेला एकही सीट नाही, पण अमित ठाकरेंना ‘सेट’ करणार; भाजपकडून राज यांना नवा प्रस्ताव?
ठाकरे गटाकडून आदित्य ठाकरे, सुषमा अंधारे, वरुण सरदेसाई ही नावे महिनाभरापासून चर्चेत आहेत. मात्र अद्याप अधिकृत दुजोरा कोणीही दिलेला नाही. त्यातच आता कल्याण लोकसभेसाठी डॉ. शिंदे यांच्या विरोधात सेनेचे दिवंगत जिल्हाप्रमुख आनंद दिघे यांचे पुतणे केदार दिघे रिंगणात उतरण्याची चर्चा सुरू झाली आहे. कल्याण लोकसभा या मुंब्रा, कळवापासून अंबरनाथपर्यंत पसरलेल्या मतदारसंघात संमिश्र मतदार असले तरीही इतक्या वर्षानंतरही धर्मवीर आनंद दिघे यांच्या आठवणी प्रत्येक शिवसैनिकांच्या मनात ताज्या आहेत.
मुख्यमंत्री शिंदे आणि त्यांचे चिरंजीवदेखील शिवसेनाप्रमुख बाळासाहेब ठाकरे शिवसेनेचे दिवंगत नेते आनंद दिघे यांचा आदर्श घेऊन पक्ष चालवत असल्याचे वारंवार अधोरेखित करताना दिसतात. तर पक्ष फुटीनंतर केदार दिघे यांनी ठाणे लोकसभा जिल्हाप्रमुख पदाची जबाबदारी स्वीकारत आपण ठाकरे गट शिवसेनेबरोबरच असल्याचे दाखवून दिले आहे.
शिंदेंच्या हातून शिवसेना जाणार? भाजपचा धडकी भरवणारा प्रस्ताव; राजकीय कारकीर्द संपण्याची भीती
एकीकडे लोकसभा कोण लढवणार हे नक्की होत नसताना आता केदार दिघे यांच्या नावाने जोर धरला आहे. दरम्यान कल्याण लोकसभा महाविकास आघाडीकडून शिवसेनेला मिळाली असून या मतदारसंघात पक्षाकडून जो उमेदवार दिला जाईल त्या उमेदवाराला निवडून आणण्यासाठी प्रत्येक शिवसैनिक शर्थीचे प्रयत्न करणार असून ही लोकसभा आपणच जिंकणार असल्याचा दावा शिवसेना ठाकरे गटाच्या पदाधिकाऱ्यांनी केला आहे.