धुळे : लोकसभेच्या निवडणुका जाहीर झाल्यानंतर निवडणुकीच्या रणधुमाळीला आता सुरुवात झाली आहे. खासदारांकडून मतदारांच्या अपेक्षा व्यक्त होऊ लागल्या असून धुळे तालुक्यातील हेंदरून हे गाव खासदार डॉ. सुभाष भामरे यांनी दत्तक घेतले होते. मात्र, या गावातील ग्रामस्थांनी खासदारांबाबत प्रचंड नाराजी व्यक्त केली आहे.लोकसभेच्या अठराव्या निवडणुका जाहीर झाल्या असून निवडणुकांच्या रणधुमाळीला सुरुवात झाली आहे. गेल्या पाच वर्षात खासदारांनी दिलेल्या आश्वासनांची पूर्तता झाली की नाही याबाबत नागरिकांच्या प्रतिक्रिया ”महाराष्ट्र टाइम्स ऑनलाईन”ने जाणून घेतल्या आहेत. धुळे तालुक्यातील हेंदरून हे गाव खासदार डॉ. सुभाष भामरे यांनी दत्तक घेतले होते. मात्र, गेल्या पाच वर्षात सुभाष भामरे यांनी दिलेली आश्वासने पूर्ण केलेली नसून गावाचा पाण्याचा प्रश्न आजही कायम आहे. तसेच गावातील रस्त्यांची दुरावस्था झाली असून कोणत्याही सोयी सुविधा गावात नसल्याने नागरिकांनी नाराजी व्यक्त केली आहे.
सुलवाडे जामफळ कनोली उपसा सिंचन योजनेतून पाण्याचा प्रश्न सोडविण्याचे आश्वासन खासदारांनी गेल्या पाच वर्षांपूर्वी दिले होते. मात्र ही योजना पूर्ण झालेली नाही. तसेच गावात बस वेळेवर येत नाही, रस्त्यांची दुरावस्था झाली आहे, शेतकऱ्यांच्या शेतीमालाला हमीभाव मिळत नाही. या प्रश्नांबाबत खासदारांनी गांभीर्याने लक्ष घालावे. सुभाष भामरे हे गावात आल्यानंतर येथील स्थानिक पुढाऱ्यांना भेटतात. मात्र, ग्रामस्थांशी चर्चा करत नाही, अशी नाराजी ग्रामस्थांनी यावेळी व्यक्त केली.
उत्तर महाराष्ट्रातील लोकसभेच्या सहापैकी भाजपने पाचही जागांवर, तर शिवसेनेच्या शिंदे गटाने एका जागेवर उमेदवारीची घोषणा केल्यानंतर भाजपचे काम सोपे होण्याऐवजी अडचणीचे झाले आहे. सहापैकी रावेर आणि धुळ्यात भाजपच्या उमेदवारांपुढे भाजपच्या पदाधिकाऱ्यांनी बंडाचा झेंडा उगारला आहे, तर नाशिकमध्ये शिवसेना शिंदे गटाच्या उमेदवारापुढे भाजपने बंडाचा पवित्रा घेतला आहे. त्यामुळे भाजपसाठी सर्वाधिक सुरक्षित समजल्या जाणाऱ्या तिन्ही जागा डेंजर झोनमध्ये आल्या आहेत. भाजप आणि शिवसेना शिंदे गटातील वादाचा लाभ महाविकास आघाडीला मिळण्याची शक्यता निर्माण झाली आहे.