म.टा. विशेष प्रतिनिधी, नागपूर : अपघातात तरुण मुलगा गमावल्यानंतर वृद्ध आई-वडिलांनी मुलाच्या अवयवदानाचा निर्णय घेतला. त्यामुळे तिघांना नवे जीवन मिळू शकले. इशार्थ विजय चंद्रिकापुरे (वय २४) असे अवयवदान करण्यात आलेल्या तरुणाचे नाव आहे.

उंटखाना रोड, हनुमाननगर येथे राहणाऱ्या इशार्थच्या मागे आई-वडील व एक लहान बहीण आहे. बारावी झालेला इशार्थ एका खासगी कंपनीत नोकरी करायचा. बुधवारी सायंकाळी ७च्या सुमारास तो दुचाकीने खापरीला मित्राकडे चालला होता. चिंचभुवनजवळ त्याला एका अज्ञात वाहनाने धडक दिली आणि तो रस्त्याच्या बाजूला पडला. यात त्याच्या डोक्याला गंभीर दुखापत झाली. त्याला लगेच एम्समध्ये दाखल करण्यात आले. तेथे दोन दिवस त्याच्यावर उपचार सुरू होते. मात्र प्रतिसाद नसल्याने शुक्रवारी एम्सचे वैद्यकीय अधीक्षक डॉ. मनीष श्रीगिरीवार, डॉ. आलोक उमरेडकर, डॉ. ओम असाई, डॉ. प्रियंका टिकैत या तज्ज्ञांच्या पथकाने त्याला मेंदूमृत घोषित केले.
नवी मुंबईकरांना जलदिलासा, पाणी कपातीचे संकट टळले, पाणी जपून वापरण्याचे पालिकेकडून आवाहन
एम्समधील अवयवदान समन्वयक प्रीतम त्रिवेदी व प्राची खैरे यांनी त्याच्या पालकांचे अवयवदानाविषयी समुपदेशन केले. वडिलांनी लेखी संमती दिल्यावर विभागीय प्रत्यारोपण केंद्राला ही माहिती देण्यात आली. केंद्राने प्रतीक्षा यादी तपासून अवयव वाटप निश्चित केले. त्यानुसार एक किडनी एम्समध्ये ३३ वर्षांच्या, तर दुसरी वोक्हार्टमध्ये २३ वर्षांच्या तरुणावर प्रत्यारोपित करण्यात आली. यकृत न्यू ईरा हॉस्पिटलमध्ये दाखल असलेल्या ६१ वर्षांच्या पुरुषाला देण्यात आले. एम्सतर्फे इशार्थला श्रद्धांजली वाहण्यात येऊन, त्याचे पार्थिव घरी पोहचविण्याची नि:शुल्क व्यवस्था करण्यात आली. अवयवदानाची प्रक्रिया झेडटीसीसीचे अध्यक्ष डॉ. संजय कोलते, सचिव डॉ. राहुल सक्सेना व समन्वयक दिनेश मंडपे यांनी पार पाडली.