पुणे: राजकारणातील कट्टर विरोधक असलेले शरद पवार आणि अनंतराव थोपटे यांची आज जवळपास २५ वर्षानंतर भेट झाली. आज शरद पवार यांच्या उपस्थितीत भोर येथे शेतकरी मेळावा पार पडत असून महविकास आघाडीचे सर्व नेते या सभेला संबोधित करणार आहेत. मात्र, मेळावा सुरू होण्याअगोदर शरद पवार आणि अनंतराव थोपटे यांची आमदार संग्राम थोपटे यांच्या निवासस्थानी भेट घेतली. यावेळी काँग्रेसचे नेते बाळासाहेब थोरात, आमदार संग्राम थोपटे उपस्थित होते. यावेळी शरद पवार यांनी अनंतराव थोपटे यांच्या तब्येतीची विचारपूस देखील केली.शरद पवारांसोबत बाळासाहेब थोरात, माझी खासदार नाना नवले, महाराष्ट्र काँग्रेसचे उपाध्यक्ष देविदास भन्साळी उपस्थित होते. या भेटी दरम्यान थोपटे कुटुंबातील अनंतराव थोपटे, त्यांचे पुत्र संग्राम थोपटे, संग्राम थोपटे यांची पत्नी स्वरूपा थोपटे, संग्राम थोपटे यांचा मुलगा पृथ्वीराज थोपटे, संग्राम थोपटे यांची मुलगी तेजस्विनी थोपटेही यावेळी उपस्थित होते.

अनंतराव थोपटे हे भोर विधानसभेचे काँग्रेसचे विद्यमान आमदार संग्राम थोपटे यांचे वडील आहेत. काही दिवसांपूर्वी उपमुख्यमंत्री अजित पवार यांच्या पत्नी सुनेत्रा पवार यांनी अनंतराव थोपटे यांची भेट घेतली होती.
एकनाथ खडसे बॅकफूटवर, रक्षा खडसेंचाही पत्ता कट होणार? रावेरमध्ये भाजप, पवारांकडून नव्या उमेदवाराचा शोध
थोपटे घराणं काँग्रेसशी एकनिष्ठ

थोपटे घराणं पहिल्यापासून काँग्रेसशी एकनिष्ठ राहिले आहेत. बारामती लोकसभा मतदारसंघातील भोर विधानसभेमध्ये येणाऱ्या भोर, वेल्हा, मुळशी या तीनही तालुक्यात थोपटे यांचं गेली तीन ते चार दशकं वर्चस्व राहिलं आहे. अनंतराव थोपटे हे ६ वेळा काँग्रेस पक्षाकडून विधानसभेवर आमदार म्हणून निवडून गेले आहेत. तर, त्यांचे पुत्र आणि भोर विधानसभा मतदारसंघांचे विद्यमान आमदार संग्राम थोपटे हे सलग ३ वेळा काँग्रेसकडून आमदार म्हणून निवडून आले आहेत.

अनंतराव थोपटे यांनी त्यांच्या कार्यकाळात महाराष्ट्रासाठी मंत्रीपदही भूषवलं आहे, तर थोपटे हे मुख्यमंत्री पदाचे दावेदार असताना पवार यांनी त्यांच्या विरोधात राष्ट्रवादीचा उमेदवार देऊन थोपटे यांना पाडलं होतं. तेव्हापासून ते एकमेकांचे कट्टर विरोधक मानले जातात. तेव्हापासून पवार आणि थोपटे यांचं कधीच पटले नव्हतं. तर २०१९ नंतर नाना पटोले यांनी विधानसभा अध्यक्ष पदाचा राजीनामा दिल्यानंतर अध्यक्ष पदासाठी संग्राम थोपटे यांचं नाव चर्चेत असताना राष्ट्रवादीतूनच त्यांना अंतर्गत विरोध पहायला मिळाला होता.

मतांची गणितं जुळवण्यासाठी पवारांकडून थोपटेंची भेट

राष्ट्रवादीच्या फुटीनंतर पवारांसाठी आगामी निवडणूक प्रतिष्ठेची बनली आहे. बारामतीमधून पवार यांच्यासमोर अजित पवार यांच्या माध्यमातून तगडं आव्हान असणार आहे. त्या पार्श्वभूमीवर आगामी लोकसभा निवडणुकांमध्ये मतांचं गणित जुळवण्यासाठी पवार राजकीय कार्यकिर्दीमध्ये कधीही न पटलेल्या व्यक्तीची भेट घेत असल्याचं बोललं जातं आहे.