म. टा. विशेष प्रतिनिधी, नाशिक : शिवसेना ठाकरे गटात नाशिकमध्ये खांदेपालट केल्यानंतर पक्षप्रमुख उद्धव ठाकरे यांनी गुरुवारी या पदाधिकाऱ्यांना ‘मातोश्री’वर पाचारण करीत त्यांच्याशी नाशिक लोकसभेबाबत चर्चा केली. लोकसभा निवडणुकीत गद्दारांना धडा शिकवून आपला उमेदवार निवडून आणा, असे आवाहन यावेळी त्यांनी पदाधिकाऱ्यांना केले.
आपसातील मतभेद-मनभेद बाजूला सारून महाविकास आघाडीच्या विजयासाठी कामाला लागण्याच्या सूचना त्यांनी पदाधिकाऱ्यांना केल्या. लोकसभा निवडणुकीच्या पार्श्वभूमीवर उद्धव ठाकरेंनी नाशिकमध्ये पक्षांतर्गत फेरबदल केले आहेत. लोकसभा संघटकपदी विजय करंजकर, जिल्हाप्रमुखपदी सुधाकर बडगुजर, तर महानगरप्रमुखपदी विलास शिंदे यांची निवड करण्यात आल्यानंतर या नवनियुक्त पदाधिकाऱ्यांसह नाशिकमधील ठाकरे गटाच्या पदाधिकाऱ्यांनी गुरुवारी मुंबईत पक्षप्रमुख ठाकरे यांची भेट घेतली. यावेळी खासदार संजय राऊत यांच्यासह सहसंपर्कप्रमुख दत्ता गायकवाड, माजी महापौर वसंत गिते, विनायक पांडे, डी. जी. सूर्यवंशी, दीपक दातीर, अस्लम मनियार आदी उपस्थित होते.
ठाकरे यांनी नूतन पदाधिकाऱ्यांना पुढील वाटचालीसाठी शुभेच्छा देताना आगामी लोकसभा निवडणूक पक्षासाठी महत्त्वपूर्ण असल्याचे सांगितले. निवडणुकीसाठी बूथ रचना सक्षमपणे राबवा, प्रत्येक बूथवर बूथप्रमुखांची नेमणूक करून जबाबदारीचे वाटप करा, केंद्रातील भाजप आणि राज्यातील महायुती सरकारचे अपयश घरोघरी पोहोचवा. प्रत्येक बूथवरीला यादीतील किमान अडीचशे मतदारांशी प्रत्यक्ष संपर्क करून महाविकास आघाडीची भूमिका पटवून द्या. जबाबदारी दिली आता ती पूर्ण करून दाखवा, अशा सूचनाही ठाकरे यांनी नवनियुक्त पदाधिकाऱ्यांना केल्या.
आदित्य ठाकरे नाशिक दौऱ्यावर
लोकसभा निवडणुकीसाठी उद्धव ठाकरेंआधी नाशिकच्या मैदानावर पुन्हा आदित्य ठाकरे येणार आहेत. उद्धव ठाकरे व आदित्य ठाकरे यांच्या राज्यभर जाहीर सभा होणार आहेत. त्याचाच एक भाग म्हणून येत्या ३ मार्च रोजी नाशिक लोकसभा मतदारसंघातील घोटी येथे आदित्य ठाकरे यांची जाहीर सभा होणार आहे.
‘आपल्यावर सूडबुद्धीने कारवाई’
ठाकरेंनी बडगुजर यांच्या पाठीशी उभे राहत त्यांच्यावर गुन्हे दाखल केल्याबद्दल विचारपूस केली. केवळ अन् केवळ राजकीय सूडबुद्धीने मला काही प्रकरणांमध्ये अडकविण्याचे काम केले जात आहे. माझा कायद्यावर पूर्ण विश्वास आहे. खोट्या गुन्ह्यात मला गोवण्याचा प्रयत्न झाला, तरी सत्य समोर येईलच. नि:पक्षपातीपणे कार्यवाही झाली पाहिजे. जिल्हाप्रमुखपद मिळाल्यामुळे ग्रामीण भागातही ठाकरे गटाचा झंझावात निर्माण होऊ शकतो, या भीतीपोटी सत्ताधारी गटाने मला डॅमेज करण्याचा प्रकार केला असावा. राजकीय द्वेषापोटी सुरू असलेले प्रकार जनता-जनार्दन उघड्या डोळ्यांनी पाहत आहे. लोकांना असल्या राजकारणाचा आता तिटकारा वाटत आहे. त्यामुळे ते संबंधितांना धडा शिकविल्याशिवाय राहणार नाही, असे बडगुजर यांनी सांगितले.