म. टा. प्रतिनिधी, पिंपरी: सोशल मीडियाच्या ग्रुपवर आपलेच वर्चस्व राहावे आणि जुन्या भांडणाचा राग मनात धरून मित्राच्या डोक्यात दगड घालून निर्घृणपणे खून केला. एवढेच नाही तर खून करतानाचा व्हिडिओ काढून तो सोशल मीडियावर व्हायरल केल्याचा धक्कादायक प्रकार सोमवारी रात्री चाकण येथे घडला.

मेदनकरवाडी येथे राहणाऱ्या सतरा वर्षीय मुलाचा खून करण्यात आला असून, या प्रकरणी त्याच्या आजोबांनी चाकण पोलिस ठाण्यात फिर्याद दिली आहे. त्यानुसार, खून करणाऱ्या दोन अल्पवयीन मुलांना ताब्यात घेण्यात आले आहे.

पोलिसांनी दिलेल्या माहितीनुसार, मृत मुलावर गेल्या वर्षी खेड पोलिस ठाण्यात खुनाचा गुन्हा दाखल आहे. मृत मुलगा आणि दोन्ही आरोपी मित्र होते. मृत मुलगा गुन्हेगार असल्याने स्वतःला नेहमीच भाई समजत होता. त्यामुळे तो नेहमीच मित्रांना हाणामारी करायचा. सोमवारी दिवसभर मृत मुलगा आणि दोन्ही आरोपी बिअर प्यायले. दारूच्या नशेत त्यांची भांडणे झाली. या रागातून आरोपींनी मित्राच्या डोक्यात दगड घालून खून केला. भाईगिरीमुळेच त्यांच्यात खुन्नस झाली होती. त्यातूनच हा गुन्हा घडल्याचे समोर आले आहे.

नशा उतरताच व्हिडिओ केला डिलिट

आरोपी असलेल्या दोघांपैकी मुख्य आरोपी मुलावर हाणामारीचे गुन्हे दाखल आहेत. मित्राच्या डोक्यात दगड घालून खून केल्यानंतर नशेतच त्यांनी व्हिडिओ तयार केला. व्हिडिओ तयार करताना पुन्हा मित्राच्या डोक्यात दगड घातला. त्यानंतर हा व्हिडिओ सोशल मीडियावर टाकला. मात्र, नशा कमी होताच आरोपींनी हा व्हिडिओ डिलिट केला.
मृत आणि आरोपी मित्र आहेत. दारूच्या नशेत जुन्या वादातून त्यांच्यात भांडणे झाली. त्यातून आरोपींनी मित्राच्या डोक्यात दगड घालून खून केला. पोलिसांनी आरोपींना ताब्यात घेऊन बालन्यायालयाकडे सुपूर्द केले आहे, अशी माहिती चाकण विभागाचे सहायक पोलिस आयुक्त राजेंद्रसिंह गौर यांनी दिली.