नागपूर: नागपूर कस्टम्स एअर इंटेलिजन्स युनिट (AIU) आणि एअर कस्टम्स युनिट (ACU) ने शुक्रवारी पहाटे डॉ. बाबासाहेब आंबेडकर आंतरराष्ट्रीय विमानतळावर सोन्याच्या तस्करीचा मोठा प्रयत्न हाणून पाडला. यात २० आयफोन, सात महागडी घड्याळे, ८२२ ग्रॅम सोन्याची पेस्ट आणि ८ किलो केशर जप्त केले. या प्रकरणी कस्टम युनिटने आरोपी प्रवाशाला अटक केली आहे. मोहम्मद मोगर अब्बास असे आरोपी प्रवाशाचे नाव आहे. यूएईमधील शारजाह येथून तो नागपुरात आला होता. गोपनीय माहितीच्या आधारे ही कारवाई करण्यात आली आहे.
रत्नागिरी हादरलं! पुतण्याकडून काकूचा घात, मारहाणीनंतर वृद्धेला निर्दयीपणे संपवलं, धक्कादायक कारण समोर
मिळालेल्या माहितीनुसार, डॉ. बाबासाहेब आंबेडकर आंतरराष्ट्रीय विमानतळावर कस्टम्सच्या एअर इंटेलिजन्स युनिट आणि एअर कस्टम युनिटने एका प्रवाशाला पकडले. त्याच्या बॅगेत बरेच कपडे असल्याने पोलिसांना संशय आला. पोलिसांनी त्याच्या बॅगेचा तपास घेतला. त्यानंतर पोलिसांनी बॅगेतून काढलेले कपडे फाडण्यास सुरुवात केली. या कपड्यांमध्ये सोन्याची पेस्ट बनियान आणि पँटमध्ये फवारलेल्या स्वरूपात शिवलेली होती. या मालाची किंमत १ कोटी ३७ लाख रुपये इतकी आहे.यानंतर सीमाशुल्क विभागाने प्रवासी मोहम्मद मोगर अब्बास याला अटक केली आहे. सीमाशुल्क आयुक्त संजय कुमार आणि सीमा शुल्क विभागाचे अतिरिक्त आयुक्त पीयूष भाटी यांच्या नेतृत्वाखाली ही कारवाई करण्यात आली. नागपूर कस्टम्स एअर इंटेलिजन्स युनिटचे सहाय्यक आयुक्त अंजुम तडवी आणि एअर कस्टम्स युनिटचे सहाय्यक आयुक्त सुरेश बाबू यांनी तस्करीच्या गुन्ह्याचा पर्दाफाश करण्यात महत्त्वपूर्ण भूमिका बजावली.

अधिकाऱ्यांनी सांगितले की, आरोपी अब्बास हा शारजा ते नागपूर फ्लाइट G9-415 मध्ये सोने आणि इतर महागड्या वस्तूंची तस्करी करत होता. कारवाईदरम्यान, १७.५० लाख रुपये किमतीचे आठ किलोग्रॅम केशर, ३ लाख रुपये किमतीची सात ॲपल ब्रँडची स्मार्ट घड्याळे आणि ६ लाख रुपये किमतीचे आयफोनही जप्त करण्यात आले.