पुणे: ट्रक चालकाचा वाहनावरील नियंत्रण सुटल्यामुळे अनेक अपघात पुण्यातल्या नवले पुलावर होत असतात. काही दिवसांपूर्वीही नवले पुलावर अपघात झाला होता. दरम्यान आज देखील नवले पुलावर एक विचित्र अपघात झाला आहे. ट्रकचालकाचे वाहनावरील नियंत्रण सुटल्याने त्याने पाठीमागून वाहनांना धडक दिल्याने विचित्र अपघात घडला आहे. या विचित्र अपघातात आठ ते नऊ वाहने एकमेकांना धडकली असून काही प्रवासी किरकोळ जखमी झाले असले तरी यातील वाहनांचे मोठे नुकसान झाले आहे. हा अपघात शनिवारी सकाळी अकरा वाजण्याच्या सुमारास घडला.
मिळालेल्या माहितीनुसार, नवले पुल चौकातून राष्ट्रीय महामार्ग ६५ व ४८ वरील सर्व्हिस रस्ते जोडले जातात. कात्रज चौक ते नवले पुल हा रस्ता सहा पदरी असून तीव्र उताराचा आहे. नवले चौकात येणारी वाहने वेगात येतात. त्यामुळे बऱ्याच वेळेस सिग्नलला उभे असलेल्या वाहनावर वेग नियंत्रित न झाल्यामुळे ब्रेक न लागल्याने जड वाहनांकडून सिग्नलला उभ्या असलेल्या वाहनांना धडक देऊन गंभीर अपघाताचे प्रकार याआधी घडलेले आहेत.
आज सकाळी ११ च्या दरम्यान एक ट्रक चालक कात्रजकडून नवले पुलाच्या दिशेने वाहन घेऊन जात असताना चालकाचं वाहणावरील नियंत्रण सुटलं म्हणून समोर थांबलेल्या धडक दिली आणि एका मागे एक वाहन धडकले. यावेळी आठ ते नऊ वाहनं एकमेकांवर धडकली. यामध्ये छोट्या मोठ्या वाहनांचं मोठं नुकसान झालं आहे. या घटनेची माहिती मिळताच सिंहगड रोड पोलिसांनी तात्काळ घटनास्थळी धाव घेतली. कारवाई करत जखमींना उपचारासाठी जवळच्या दवाखान्यात दाखल केलं आणि पुढील तपास करत आहे.