पुणे (बारामती) : शरद पवार यांच्यापासून फारकत घेत राष्ट्रवादी पक्ष व चिन्ह मिळविणाऱ्या अजित पवार यांना घरातच तगडा झटका बसण्याची चिन्हे आता दिसू लागली आहेत. अजित पवार यांचे सख्खे पुतणे युगेंद्र पवार हे बुधवारी म्हणजे उद्या दि. २१ शरद पवार गटाच्या कार्यालयाला भेट देणार असल्याची चर्चा बारामतीच्या राजकीय वर्तुळात सुरु आहे.बारामतीत नुकत्याच झालेल्या बुथ कार्यकर्ता मेळाव्यात उपमुख्यमंत्री अजित पवार यांनी ”फक्त माझा परिवारच माझ्यासोबत आहे. कुटुंबात मला एकटे पाडले जात” असल्याचं वक्तव्य केलं होतं. त्याचा प्रत्यय येण्यास आता सुरुवात झाली आहे. अजित पवार यांचे सख्खे पुतणे असलेले युगेंद्र हे शरद पवार यांच्यासोबत जाणार असल्याचे चित्र आता दिसू लागलं आहे.
मराठा आरक्षणाचं विधेयक एकमताने मंजूर, गुणरत्न सदावर्ते खवळले, हायकोर्टात आव्हान देणार
शरद पवार यांना भावनिक आवाहन न करण्याचा सल्ला देणारे अजित पवार यांनी मागील आठवड्यात बारामतीमध्ये झालेल्या कार्यकर्ता मेळाव्यामध्ये स्वतःच भावनिक आवाहन करत ”माझ्यामागे माझ्या कुटुंबाशिवाय इतर कोणी नाही” असं म्हणाले होते. त्यानंतर अवघ्या चारच दिवसात योगेंद्र पवार हे ज्येष्ठ नेते शरद पवार यांच्या गटामध्ये सक्रिय होणार असल्याची चिन्हे दिसू लागली आहेत. त्यामुळे अजित पवार यांनी राष्ट्रवादी काँग्रेसमध्ये फूट पाडताना स्वतःच्या कुटुंबीयांना विश्वासात न घेतल्याचे स्पष्ट होत आहे.

राष्ट्रवादीचे अध्यक्ष शरद पवार यांच्या वाढदिवसानिमित्त दीड महिन्यांपूर्वी कुस्तीगीर संघाचे अध्यक्ष युगेंद्र पवार यांनी कुस्ती स्पर्धेचे आयोजन केलं होतं. त्यामुळे युगेंद्र पवार हे पहिल्यापासूनच ज्येष्ठ नेते शरद पवार यांच्यासोबत राहिल्याचे दिसून येते. म्हणून युगेंद्र पवार ज्येष्ठ नेते शरद पवार यांच्यासोबतच कायम राहणार असल्याची चर्चा आता राजकीय वर्तुळात सुरु आहे. उपमुख्यमंत्री अजित पवार यांचे बंधू श्रीनिवास पवार यांचे युगेंद्र पवार हे चिरंजिव आहेत. ते सक्रीय राजकारणात नाहीत, युगेंद्र पवार हे विद्या प्रतिष्ठान संस्थेचे खजिनदार असून बारामती तालुका कुस्तीगीर संघाचेही काम पाहतात. मात्र, आता ते खासदार सुप्रिया सुळे यांच्या बाजूने प्रचार करणार हे जवळपास निश्चित झाले आहे.