म. टा. प्रतिनिधी, पुणे : आचार्य आनंदऋषीजी चौकातील (विद्यापीठ चौक) सावित्रीबाई फुले पुणे विद्यापीठाच्या मुख्य प्रवेशद्वारातून वाहनांना प्रवेश बंद करण्यात आला आहे. विद्यापीठ परिसरातील वाहतूक कोंडीवर उपाय म्हणून वाहतूक पोलिसांनी हा मार्ग निर्णय घेतला आहे. त्यामुळे विद्यापीठात जाण्यासाठी मिलेनियम गेटचा वापर करावा लागणार आहे.
विद्यापीठ परिसरातील मेट्रो आणि उड्डाणपुलाच्या कामामुळे गणेशखिंड रस्ता, औंध-बाणेर आणि सेनापती बापट रस्त्यावर सकाळी आणि सायंकाळी मोठ्या प्रमाणावर वाहतूक कोंडी होते. ही कोंडी सोडविण्यासाठी आतापर्यंत अनेक योजना करण्यात आल्या. त्यानंतरही कोंडीतून दिलासा मिळालेला नाही. त्यामुळे आता वाहतूक पोलिसांनी आणखी एक पर्याय काढला आहे.
विद्यापीठ परिसरातील मेट्रो आणि उड्डाणपुलाच्या कामामुळे गणेशखिंड रस्ता, औंध-बाणेर आणि सेनापती बापट रस्त्यावर सकाळी आणि सायंकाळी मोठ्या प्रमाणावर वाहतूक कोंडी होते. ही कोंडी सोडविण्यासाठी आतापर्यंत अनेक योजना करण्यात आल्या. त्यानंतरही कोंडीतून दिलासा मिळालेला नाही. त्यामुळे आता वाहतूक पोलिसांनी आणखी एक पर्याय काढला आहे.
नेमका बदल काय?
– सेनापती बापट रस्ता आणि गणेशखिंड रस्त्याने आचार्य आनंदऋषीजी चौकातून उजवीकडे वळून विद्यापीठात प्रवेश करता येणार नाही.
– या रस्त्याने येणाऱ्यांनी आचार्य आनंदऋषीजी चौकातून चतुःशृंगी पोलिस ठाण्यापर्यंत सरळ जावे.
– तेथे उजवीकडे वळून मिलेनियम गेटमधून विद्यापीठात प्रवेश करावा.
– औंधकडून येणाऱ्या वाहनचालकांनाही मुख्य प्रवेशद्वारातून विद्यापीठात प्रवेश मिळणार नाही. त्यांनाही मिलेनियम गेटमधूनच जावे लागेल.
– बाणेर रस्त्याने येणाऱ्या वाहनचालकांना आचार्य आनंदऋषीजी चौकात डावीकडे वळून औंध रस्त्याने चतुःशृंगी पोलिस ठाण्यापासून मिलेनियम गेटकडे जावे लागेल.
हरकती पाठविण्याचे आवाहन
‘हा बदल प्रायोगिक तत्त्वावर असून, नागरिकांच्या हरकती किंवा सूचना असल्यास ‘पोलिस उपायुक्त, वाहतूक नियंत्रण शाखा, येरवडा पोस्ट ऑफिस, बंगला क्रमांक ६, जेल रस्ता, पुणे- ४११००६’ या पत्त्यावर दोन मार्चपर्यंत पाठवाव्यात. नागरिकांच्या सूचना व हरकतींचा विचार करून अंतिम आदेश काढण्यात येईल,’ उपायुक्त शशिकांत बोराटे यांनी म्हटले आहे.
‘चौकातील क्रॉसिंग नाहीसे होणार’
वाहतूक पोलिसांनी नव्याने केलेल्या बदलामुळे आचार्य आनंदऋषीजी चौकातील क्रॉसिंग बंद होणार आहे; तसेच, सिग्नलही बंद होण्याची शक्यता आहे. त्यामुळे कोणत्याही बाजूने येणारे वाहने विनाअडथळा चौकातून पुढे जाऊ शकेल. मात्र, मिलेनियम गेटमधून जाणाऱ्या वाहनांची संख्या वाढल्यास औंध रस्त्यावरील वाहतुकीचा वेग मंदावण्याची शक्यता आहे.