सातारा: पुणे-बेंगलोर राष्ट्रीय महामार्गावर अज्ञात वाहनाने दुचाकीला धडक दिल्याने दुचाकीवरील दोघेजण जागीच ठार झाले. कऱ्हाड तालुक्यातील मौजे वाठार गावच्या हद्दीत पुणे ते कोल्हापूर जाणाऱ्या सर्व्हिस रोडवर हा अपघात झाला. प्रशांत विश्वास भोसले (३४), अमर तुकाराम अलगुडे (३५) हे दोघेही रा. धनकवडी पुणे अशी त्यांची नावे आहेत.
ShaktiPeeth Expressway : ‘शक्तिपीठ’ महामार्गामुळे घडणार ‘देवदर्शन’, नागपूर ते गोवा महामार्गावर ११ जिल्हे जोडणार
मिळालेल्या माहितीनुसार, पुणे-बेंगलोर राष्ट्रीय महामार्गावर सातारा ते कोल्हापूर लेनवर कराड तालुक्यातील वाठार गावच्या हद्दीत अज्ञात भरधाव वेगाने आलेल्या वाहनाने दुचाकीला जोराची धडक दिली. ही धडक इतकी भीषण होती, की या धडकेमुळे दुचाकीवरील प्रशांत विश्वास भोसले, अमर तुकाराम अलगुडे दोघेजण जागीच ठार झाले. हा अपघात वाठार गावच्या हद्दीत घडला. या अपघाताची माहिती मिळताच डीपी जैन कंपनीचे पीआरओ ऑफिसर दस्तगीर आगा यांनी हायवे ॲम्बुलन्स आणि पेट्रोलिंग बोलावले. तसेच कराड तालुका पोलीस ठाण्यात या अपघाताची माहिती सांगितली.

अपघातात ठार झालेल्या प्रशांत विश्वास भोसले, अमर तुकाराम अलगुडे या दोघांचे मृतदेह शवविच्छेदनासाठी कराडच्या वेणुताई चव्हाण उपजिल्हा रुग्णालयात पाठवण्यात आले. वाठार येथील प्रविण भिमराव शिंदे यांनी कराड पोलीस ठाण्यात फिर्याद दिली आहे. दस्तगीर आगा, हिंदुराव चव्हाण, कदम क्रेनचे सुनील कदम, तुषार जोशी, तालुका पोलीस स्टेशनचे पोलीस कर्मचाऱ्यांनी वाहतूक सुरळीत करण्यासाठी सहकार्य केले.