पुणे: जुन्नरचे माजी आमदार वल्लभ बेनके यांचे नुकतेच अल्पशा आजाराने निधन झाले. ते ७४ वर्षांचे होते. वल्लभ बेनके हे शरद पवार यांचे अत्यंत निकटवर्तीय म्हणून ओळखले जायचे. जुन्नर तालुक्यातील घराघरात त्यांनी राष्ट्रवादी पोहचवण्याचे काम केले. वल्लभ बेनके यांचा जन्म २३ जून १९५० रोजी हिवरे बुद्रूक या छोट्याशा गावात झाला. वल्लभ बेनके यांचा शेती हाच प्रमुख व्यवसाय होता.
वल्लभ बेनके यांना विधानसभेची सलग सहा वेळा उमेदवारी मिळाली. त्यापैकी ते चार वेळा आमदार म्हणून निवडून आले आहेत. १९८५ ते २००९ या कालावधीत त्यांनी आमदारकी भूषवली होती. कुशल संघटक, शेतकऱ्यांच्या प्रश्‍नाची जाण असणारा आणि प्रशासनावर पकड असणारा अभ्यासू नेता, सर्व सामान्य कार्यकर्त्यावर जिवापाड प्रेम करणारा, मुत्सद्दी नेता अशी त्यांनी तालुक्यात ओळख निर्माण केली होती. तसेच राष्ट्रवादीचे अध्यक्ष शरद पवार यांचे ते अत्यंत विश्वासू म्हणून ते ओळखले जातात. वल्लभ बेनके यांनी धरणग्रस्तांच्या प्रश्नासाठी त्यांनी मोठा सहभाग घेतला होता.
गोळी घातली तरी दडपशाहीसमोर कधीही झुकणार नाही; महायुती सरकारला सुप्रिया सुळेंचा इशारा
धरणग्रस्तांच्या प्रश्नांसाठी त्यांनी जवळपास दोन वर्ष संघर्ष केला. वल्लभ बेनके यांनी त्यांच्या कार्यकाळात कांदळी येथे औद्योगिक वसाहतीची स्थापना केली. लेण्याद्री आणि ओझर देवस्थानच्या परिसर विकासासाठी निधी मिळवून दिला. नारायणगाव येथे टोमॅटोचे खरेदी विक्री बाजार केंद्र सुरू केले. प्रशासनावर पकड असणारा नेता म्हणून त्यांनी नावलौकिक मिळवला. मात्र गेल्या चार ते पाच वर्षांपासून ते आजारपणामुळे राजकारणात सक्रिय नव्हते. कृष्णा खोरे विकास महामंडळात त्यांनी महत्वाची भूमिका बजावली होती. बेनके कुटुंब हे राष्ट्रवादीशी एकनिष्ठ असणारे कुटुंब म्हणून या कुटुंबाची ओळख आहे. सध्या विद्यमान आमदार म्हणून त्यांचे सुपुत्र अतुल बेनके यांच्यावर तालुक्याची धुरा आहे.