यवतमाळ : जिल्ह्यातील लोणी येथे केंद्र शासनाचा ‘घर चलो अभियान’ कार्यक्रमासाठी आलेले माजी केंद्रीय मंत्री तथा ओबीसी आयोगाचे अध्यक्ष हंसराज अहीर यांना शेतकऱ्यांनी चांगलेच धारेवर धरत खडे बोल सुनावले. शेतमालाला भाव, पिकविमा परतावा, सिंचनासाठी वीज न मिळणे असे अनेक मुद्दे मांडत शेतकऱ्यांनी हंसराज अहिर यांना कोंडित पकडले.
मोदी सरकारच्या योजना समाजविण्यासाठी भाजप नेत्यांचे ‘घर चलो अभियान’ सुरू आहे. मात्र या नेत्यांना शेतकऱ्यांच्या रोषाचा सामना करावा लागत असून अनेक गावांमध्ये या अभियानाचा रथही पिटाळून लावल्याचे समोर आले. अशातच माजी खासदार आणि ओबीसी आयोगाचे अध्यक्ष हंसराज अहीर हे लोणी गावात आलेले असताना शेतकऱ्यांनी समस्या सांगितल्या, पाढा वाचला. त्यामुळे हंसराज अहीर निरुत्तर झाले. लोणी गावात अहीर यांचा रात्रीचा मुक्काम ठरला होता, मात्र शेतकऱ्यांच्या रोषामुळे त्यांना परत जावे लागले.
सोयाबिन आणि कापसाचे भाव घसरले आहेत. सोयाबिनला प्रति क्विंटल चार ते साडे चार हजार इतका निचांकी भाव मिळतोय. तर दुसरीकडे अवकाळी पावसामुळे पिकांचे अतोनात नुकसान झाले आहे. पिकविमा भरूनही अनेक ठिकाणी नुकसानीचे पंचनामे झालेले नाही. काही ठिकाणी शेतकऱ्यांनी नुकसानीचा अत्यल्प मोबदला मिळतोय. त्यामुळे शेतकऱ्यांमध्ये संतापाची लाट आहे. मोदी सरकार विरुद्ध शेतकऱ्यांमध्ये संतापाची भावना आहे. ‘घर चलो अभियान’ दिखावा करण्याऐवजी शासनाने तात्काळ मदत करावी अशी मागणी लोणी येथील शेतकऱ्यांनी केली.
हंसराज अहीर कोण आहेत?
- हंसराज अहीर हे माजी केंद्रीय गृहराज्यमंत्री तथा राष्ट्रीय मागासवर्गीय आयोगाचे अध्यक्ष आहेत
- चंद्रपूर लोकसभा मतदारसंघाचे ते संयोजक आहेत
- चंद्रपूर लोकसभा मतदारसंघात अहीर यांचं मोठं वजन आहे
- मात्र २०१९ ला काँग्रेसच्या बाळू धानोरकर यांनी त्यांचा पराभव केला