म. टा. प्रतिनिधी, छत्रपती संभाजीनगर : जुन्या मालमत्ता कराच्या आकारणीला कोणताही धक्का न लावता नवीन आर्थिक वर्षापासून (एक एप्रिल) मालमत्ताकरात वाढ करण्यात येत असल्याची माहिती महापालिकेचे प्रशासक जी. श्रीकांत यांनी दिली. पाचशे चौरस फुटांच्या निवासी मालमत्तेला सध्या ३५९३ रुपये कर आकारला जातो. एक एप्रिलपासून ही रक्कम ५९४७ रुपये होईल. व्यावसायिक मालमत्तांसाठी सध्या १४ हजार रुपये कर आकारणी केली जाते. नवीन आर्थिक वर्षापासून ३१,९२४ रुपये कर आकारला जाईल, असे श्रीकांत यांनी सांगितले.

शासनाच्या नियमानुसार दर वर्षी २० फेब्रुवारीपर्यंत नवीन आर्थिक वर्षाच्या कर आकारणीचे धोरण महापालिकेला ठरवणे बंधनकारक आहे. त्यादृष्टीने गेल्या काही दिवसांपासून प्रशासनाच्या स्तरावर तयारी केली जात होती. ती पूर्ण झाल्यानंतर श्रीकांत यांनी शुक्रवारी पत्रकारांना माहिती दिली.

जी. श्रीकांत म्हणाले, ‘नव्याने बांधलेल्या मालमत्तांना जुन्या दराने कर आकारणी योग्य नाही. महापालिकेच्या कायद्यात तशी तरतूदही आहे. रेडीरेकनरच्या आधारे कर आकारणी केली जाते; पण छत्रपती संभाजीनगर शहरात भाड्यावर आधारित कर आकारणी (रेंटल व्हॅल्यू बेस्ड) कर आकारणी केली जाते. त्याच आधारावर नवीन आर्थिक वर्षापासून कर आकारणी केली जाणार आहे. आतापर्यंत बऱ्याच मालमत्तांना कर आकारणी झालेली नाही. अशा मालमत्तांना कर आकारणी करण्याचे महापालिकेचे उद्दिष्ट आहे. सर्व मालमत्तांच्या करामध्ये दर पाच वर्षांनी वाढ होणे गरजेचे आहे; पण प्रशासन सध्याच्या करांमध्ये कोणत्याही प्रकारची वाढ करणार नाही. एखाद्या मालमत्तेला कर आकारणी करताना महापालिका अधिनियमानुसार सहा वर्षांपूर्वीपासून कराची आकारणी केली जाते, हीच पद्धत यापुढेदेखील सुरू राहील.’

वाढीव कर कोणाला?

– कर आकारणी झालेल्या मालमत्तांच्या करामध्ये यंदा वाढ नाही
– ज्या मालमत्तांना अद्याप कर आकारणी झालेली नाही, त्यांना नवीन आर्थिक वर्षापासून वाढीव कर
– नवीन मालमत्ताधारकांनी मालमत्ता कर लावून घेतल्यास त्यांना जुन्या पद्धतीनेच कर आकारणी केली जाईल.
– एक एप्रिलपासून कराच्या दरात वाढ होणार

नवा कर कसा असेल?

– किमान ५०० चौरस फूट क्षेत्रफळाच्या मालमत्तांना सध्या ३५९३ रुपये कर
– एक एप्रिलपासून २०२४-२५ या वर्षासाठी याच क्षेत्रफळाच्या निवासी मालमत्तेला ५९४७ रुपये कर
– पाचशे चौरस फुटांच्या व्यावसायिक मालमत्तेला सध्या १४ हजार रुपये कर
– एक एप्रिलपासून ३१,९२४ रुपये कर