पुणे : पुण्यातील कुख्यात गुंड शरद मोहोळ खून प्रकरणातील चौकशी पुणे पोलिसांकडून सुरू आहे. दरम्यान, पोलिसांच्या हाती शरद मोहोळ खून प्रकरणातील कट कसा रचला? किंवा प्लॅन काय होता? याच्या संपर्काचे संपूर्ण ऑडिओ क्लिप्स पोलिसांच्या हाती लागल्या आहेत. एक, दोन नाही तर तब्ब्ल १९ हजार ८२७ ऑडिओ क्लिप्स पोलिसांच्या हाती लागल्या आहेत. मात्र, एकही ऑडिओ क्लिप पोलिसांनी सादर केलेली नाहीय.
कुख्यात गुंड शरद मोहोळ खून प्रकरणात सराईत गुन्हेगार विठ्ठल शेलार व गणेश मारणे या मुख्य सुत्रधारांसह एकूण १६ जणांना पुणे पोलिसांच्या गुन्हे शाखेने अटक केली आहे. सदर गुन्हयाची व्याप्ती पाहता, पुणे पोलिसांच्या गुन्हे शाखेने आरोपींवर मोकका अंर्तगत कारवाई केली आहे. संबंधित गुन्हयाच्या तपासात एक मोठी अपडेट समोर आली आहे. चौकशी दरम्यान पोलिसांना आरोपींच्या मोबाईलमधून एकमेकांशी संपर्क केलेल्या तब्बल १९ हजार ८२७ ऑडिओ क्लिप्स मिळून आल्या आहेत. यापैकी साडे दहा हजार क्लिप्सचे तांत्रिक विश्लेषण करत असताना, पुराव्याचे अनुषंगाने सहा महत्वपूर्ण क्लिप्स मिळाल्या असून नवीन महत्वपूर्ण माहिती पोलिसांना प्राप्त झाली आहे. त्याआधारे अभिजीत मानकर (वय ३१, रा. दत्तवाडी, पुणे ) याला अटक करण्यात आली आहे.
शरद मोहोळ याच्या खुनाचा कट आरोपींनी नेमका कशाप्रकारे केला त्याचे नियोजन कसं केलं याबाबतचे संभाषण पुरावे संबंधित ऑडिओ क्लिप्समधून प्राप्त झाले आहे. या गुन्ह्यातील मुख्य आरोपी असलेल्या सराईत गुन्हेगार विठ्ठल शेलार याने शरद मोहोळ याच्या खुनासाठी काही रक्कम देखील इतर हल्लेखोर ओरोपींना दिले असल्याचे तपासात समोर आलं आहे.
शरद मोहोळ याचा ५ जानेवारी रोजी कोथरुड परिसरात सुतारदरा येथे त्याचा सहकारी मुन्ना पोळेकर व साथीदारांनी जवळून गोळ्या झाडून खून केला होता. या गुन्हयाची घटना सीसीटीव्हीत देखील कैद झाली होती. गुन्हे शाखेच्या पोलिसांनी तपासात दोन वकीलांसह एकूण १६ जणांना आतापर्यंत अटक केलेली आहे. सदर आरोपींवर मोकका कारवाई करण्यात आल्यावर त्यांची पुन्हा पोलीस कोठडी घेण्यात आली. यादरम्यान पोलिसांना महत्वपूर्ण पुरावा ऑडिओ क्लिपच्या माध्यमातून हाती लागला आहे. संबंधित सर्व ऑडिओ क्लिपचे विश्लेषण करुन पुरावे जमा केले जाणार असल्याची महिती पोलिसांनी दिली आहे.