म. टा. वृत्तसेवा, कल्याण: भाजप आमदार गणपत गायकवाड यांनी केलेल्या गोळीबारामागे जमिनीच्या वादाचे तात्कालिक कारण असले तरी राजकीय वादातूनच हा प्रकार घडल्याची चर्चा आहे. कल्याणमध्ये विधानसभा निवडणुकीत गणपत गायकवाड यांच्यासह भाजपला शह देण्याची रणनीती शिवसेनेने आखल्याने राजकीय वर्चस्वावरून हा प्रकार घडल्याचे मानले जाते.
राज्यात महायुती सत्तारूढ झाल्यापासूनच कल्याण पूर्वेत भाजप आणि शिवसेना यांच्यात धुसफूस सुरू होती. माजी नगरसेवक महेश गायकवाड यांनी खासदार श्रीकांत शिंदे यांचा विश्वास संपादन करून कल्याण पूर्वेत दबदबा निर्माण केला. महेश गायकवाड यांना कल्याण पूर्व विधानसभा मतदारसंघातून उमेदवारी देण्याचे आश्वासन वरिष्ठांनी दिले होते, अशी चर्चा आहे. त्यादृष्टीने त्यांनी गेल्या काही महिन्यांपासून जोरदार तयारी सुरू केली होती.
राज्यात महायुती सत्तारूढ झाल्यापासूनच कल्याण पूर्वेत भाजप आणि शिवसेना यांच्यात धुसफूस सुरू होती. माजी नगरसेवक महेश गायकवाड यांनी खासदार श्रीकांत शिंदे यांचा विश्वास संपादन करून कल्याण पूर्वेत दबदबा निर्माण केला. महेश गायकवाड यांना कल्याण पूर्व विधानसभा मतदारसंघातून उमेदवारी देण्याचे आश्वासन वरिष्ठांनी दिले होते, अशी चर्चा आहे. त्यादृष्टीने त्यांनी गेल्या काही महिन्यांपासून जोरदार तयारी सुरू केली होती.
महेश गायकवाड यांच्या वर्चस्वामुळे स्थानिक भाजप आमदार गणपत गायकवाड अस्वस्थ होते. त्यातूनच मुख्यमंत्री एकनाथ शिंदे यांच्यावर थेट आरोप करून गणपत गायकवाड यांनी खासदार श्रीकांत शिंदे यांचा रोष ओढवून घेतला होता. कल्याणमधील अनेक कार्यक्रमांत भाजप-शिवसेना यांच्यातील विसंवादाचे प्रतिबिंब उमटत होते. मतदारसंघात केलेल्या कामाचे श्रेयही मिळत नसल्याची गणपत गायकवाड यांची तक्रार आहे. याबाबत भाजपच्या वरिष्ठांकडे तक्रार करूनही दुर्लक्ष झाल्याने कल्याणमध्ये भाजप-शिवसेना यांच्यातील दरी वाढत गेली.
गेल्या विधानसभा निवडणुकीत युती असूनही आमदार गणपत गायकवाड यांना शह देण्यासाठी शिवसेनेकडून धनंजय बोडारे यांना अपक्ष म्हणून रिंगणात उतरविण्यात आले होते. मात्र, त्यांचा पराभव झाला. आता राज्यात महायुतीची सत्ता येताच कल्याण पूर्वेत शिवसेनेकडून आपले खच्चीकरण होत असल्याचा आरोप करत भाजपच्या कार्यकर्त्यांनी लोकसभा निवडणुकीत शिवसेनेला सहकार्य न करण्याचा ठरावही केला होता.
ही धुसफूस चार दिवसांपासून द्वारलीत उफाळून आली. कल्याण पूर्वेतील द्वारली गावात १९९६ मध्ये विकत घेतलेल्या जमिनीची पुन्हा विक्री रोखून जमिनीचा ताबा आमदार गणपत गायकवाड हे भागीदार असलेल्या ‘फेअरडील डेव्हलरपर्स’ने मिळवण्याचा प्रयत्न केला. मात्र, या प्रकरणात महेश गायकवाड यांची जमीन मालकांना फूस असल्याचे चित्र निर्माण झाले आणि गोळीबाराची घटना घडली. त्यासाठी वरकरणी जमिनीचे कारण असल्याचे दिसत असले तरी राजकीय वैमनस्य कारणीभूत असल्याची चर्चा आहे.
आमदार गायकवाड यांच्यावर अॅट्रॉसिटीचा गुन्हा
कल्याण : आमदार गणपत गायकवाड यांच्यासह ११ जणांविरोधात हिललाइन पोलीस ठाण्यात अॅट्रॉसिटीचा गुन्हा नोंदवण्यात आला आहे. गोळीबार प्रकरणाच्या केंद्रस्थानी असलेल्या द्वारली येथील जमिनीवरून गायकवाड यांनी जातीवाचक शिवीगाळ केल्याची तक्रार मधुमती जाधव आणि अन्य महिलांनी केली होती. त्यानुसार, गुन्हा दाखल झाल्याने गायकवाड यांच्या अडचणीत वाढ झाली आहे.