दरम्यान छगन भुजबळांनी त्यांच्या भाषणात मराठा आरक्षण आणि मनोज जरांगे यांच्यावर निशाणा साधला आहे. ते म्हणाले की, एव्हढा मोठा जोक कधी झालाच नव्हता. उपोषणवाले साहेब म्हणतात, बजेटमधून आरक्षण मिळालं तर बघा. मला याचं वाईट वाटलं. सीतारामन सगळं बोलल्या मात्र आरक्षणाचं काही बोलल्याच नाहीत. मला काही समजत नाही. मला मराठा समाजातील नेत्यांची आणि विचारवंतांची कीव येते. असा कसा तुमचा नेता, जो म्हणतो बजेटमधून आरक्षण देता येतं का पहा. यावर कोणी बोलायला तयार नाही. कुणाच्या मागे चाललात तुम्ही, असं म्हणत भुजबळांनी मनोज जरांगेंवर टीका केली आहे.

ते पुढे म्हणाले की, गावागावात दरी पडत आहे. आम्ही आमच्या हक्कासाठी लढतो. आम्ही सांगतो आमचं आरक्षण कमी करु नका. त्यांना आरक्षण वेगळं द्या. ही आमची मागणी चुकीची आहे का? आज गावागावात ओबीसींना छळलं जात आहे. पोलीस तक्रार घेत नाहीत. तरीही उपोषणकर्ता म्हणतो, पूर्ण मंडल आयोगच चॅलेंज करून संपवून टाकतो. त्यांना ओबीसीमधून आरक्षण घ्यायचंय आणि मंडल आयोग संपवायचं आहे. मात्र त्या मंडलमध्ये ओबीसी आरक्षण आहे ना. ते संपलं तर हे ही जाईल. तरीही हे का मागता? सर्व ठिकाणी दादागिरी चालू आहे.