आमदार गणपत गायकवाड यांनी एकूण सहा गोळ्या झाडल्या होत्या. या गोळीबारात जखमी झालेल्या महेश गायकवाड यांना ज्युपिटर रुग्णालयात उपचारासाठी दाखल करण्यात आलं आहे. कल्याण डोंबिवलीचे खासदार आणि मुख्यमंत्र्यांचे सुपुत्र श्रीकांत शिंदे यांनी महेश गायकवाड यांची भेट घेत त्यांच्या प्रकृतीची विचारपूस केली.
महेश गायकवाड कोण आहेत?
महेश गायकवाड हे मुख्यमंत्री एकनाथ शिंदे यांच्या नेतृत्वातील शिवसेनेचे कल्याण शहर प्रमुख आहेत. कल्याणमधील सामाजिक कार्यात गायकवाड यांचा सहभाग असतो. महेश गायकवाड यांच्यासाठी लावलेल्या एका बॅनरवर त्यांचा ‘भावी आमदार’ असा उल्लेख करण्यात आला होता.
गणपत गायकवाड आणि महेश गायकवाड यांच्यात पूर्वीपासून राजकीय वाद सुरु आहे. विविध कारणांवरुन दोघांमध्ये आधीही खटके उडाले आहेत.
गणपत गायकवाड कोण आहेत?
गणपत गायकवाड हे कल्याण पूर्व विधानसभा मतदारसंघातून सलग तीन वेळा आमदारपदी निवडून आले आहेत. गणपत गायकवाड पूर्वी रिक्षा चालक होते. याशिवाय त्यांचा केबलचाही व्यवसाय होता. मात्र त्यांनी राजकीय क्षेत्रात प्रवेश करत अल्पावधीतच लोकप्रियता मिळवली. कल्याणमध्ये त्यांचा दांडगा जनसंपर्क आहे.
पहिली विधानसभा निवडणूक त्यांनी अपक्ष म्हणून लढवली होती. मात्र आमदारकी मिळाल्यानंतर त्यांनी भाजपमध्ये प्रवेश केला. गायकवाड हे गृहमंत्री देवेंद्र फडणवीस यांचे निकटवर्तीय मानले जातात. त्यामुळे फडणवीस त्यांच्यावर काय कारवाई करतात, याकडे सर्वांचं लक्ष आहे.
Read Latest Maharashtra News Updates And Marathi News