भाच्याने मित्राच्या मदतीने मामाचेच घर फोडून पाच लाख १५ हजार १३० रुपयांचा मुद्देमाल चोरून नेला. गुन्हे शाखेने अवघ्या दहा दिवसांत घरफोडी करणाऱ्या दोन जणांना ताब्यात घेतले. शाकेर खान शकूर खान (रा. प्रियदर्शनी, गारखेडा) असे अटकेतील भाच्याचे, तर शेख मुख्तार शेख महेबूब (रा. पाचोरा, जि जळगाव) असे घरफोडी करणाऱ्या गुन्हेगाराचे नाव आहे.

गुन्हे शाखेचे पोलिस निरीक्षक संदीप गुरमे यांनी माहिती दिली. सय्यद शकील सय्यद उमर (रा. वैशाली ढाबा, पिसादेवी रोड) यांच्या घरात ही चोरी झाली होती. या घटनेचा समांतर तपास करणाऱ्या गुन्हे शाखेला ही चोरी मुक्तार शेख महेबुब यांनी केल्याची माहिती मिळाली. त्यावरून हवालदार संजय मुळे, प्रकाश गायकवाड, नवनाथ खांडेकर, अंमलदार अमोल शिंदे, नितीन देशमुख, शाम आढे, ज्ञानेश्वर पवार यांनी जळगावला जाऊन मुख्तारला ताब्यात घेतले.