सरकारी वकील नीलिमा इथापे-यादव व तक्रारदारांचे वकील अॅड. गोपाल भोसले यांनी यांनी तपासातील प्रगती पाहता आरोपींच्या पोलिस कोठडीत वाढीची मागणी केली. बचाव पक्षाचे वकील अॅड. केतन कदम यांनी त्याला विरोध दर्शविला. ‘आरोपींची पोलिस कोठडी वाढविण्यासाठी तपास अधिकारी गृहितकावर आधारित जुनीच कारणे देत असून, बँक स्टेटमेंट, सीसीटीव्ही चित्रीकरण आदी तांत्रिक पुरावे पडताळण्यासाठी आरोपींच्या प्रत्यक्ष कोठडीची गरज नाही. त्यामुळे आरोपींना न्यायालयीन कोठडी देण्यात यावी,’ अशी मागणी अॅड. कदम यांनी केली. न्यायालयाने दोन्ही बाजूंचा युक्तिवाद ऐकल्यावर आरोपींच्या पोलिस कोठडीत आठवडाभराची वाढ केली.

बचाव पक्षाकडून ‘प्लँचेट’चे आरोप

‘पोलिसांकडून आरोपींची पोलिस कोठडी मागितली जाते. त्यानंतर वेगळ्याच गोष्टी ‘रेकॉर्ड’वर येतात. पोलिस ‘प्लँचेट’ही करतात,’ असा आरोप बचाव पक्षाचे वकील अॅड. केतन कदम यांनी युक्तिवादादरम्यान केला. त्यावर ‘या गुन्ह्याच्या तपासात कोठेही ‘प्लँचेट’चा वापर केलेला नाही, ही बाब बचाव पक्षाच्या वकिलांच्या आरोपामुळे नोंदीवर घ्यावी,’ अशी विनंती तपास अधिकारी सुनील तांबे यांनी केली. सरकारी वकील नीलिमा इथापे-यादव यांनीही बचाव पक्षाचे आरोप खोडून काढले.

पिस्तुल पुरवणारे दोघे ताब्यात

या गुन्ह्यात तीन पिस्तुले वापरण्यात आली होती. आरोपींना ही पिस्तुले कोणी पुरवली, याचा गुन्हे शाखेकडून शोध घेण्यात येत होता. दरम्यान, गुन्हे शाखेने पिस्तुल पुरवल्याप्रकरणी दोघांना ताब्यात घेतले आहे.

आमची घटना अवैध, मग आमदार वैध कसे? राहुल नार्वेकरांच्या निर्णयावर उद्धव ठाकरेंची सडकून टीका