म. टा. प्रतिनिधी, पुणे : पुणे महानगर परिवहन महामंडळाच्या (पीएमपीच्या) ठेकेदारामार्फत चालविल्या जाणाऱ्या २६६ बसला काही महिन्यांत १० वर्षे पूर्ण होत आहेत. त्यामुळे कराराप्रमाणे ताफ्यातून या बस कमी होणार आहेत. ‘पीएमपी’च्या स्व-मालकीच्या दीडशेपेक्षा जास्त बसना १२ वर्षे पूर्ण होत आहेत. त्यामुळे ‘पीएमपी’ला बसची चणचण भासणार आहे. प्रवाशांना चांगली सेवा देण्यासाठी ‘पीएमपी’ला तातडीने नवीन बस घ्याव्या लागणार आहेत.
पुणे, पिंपरी-चिंचवड आणि ‘पीएमआरडीए’च्या हद्दीत पीएमपीकडून सार्वजनिक वाहतूक सेवा पुरविली जाते. सध्या पीएमपीच्या ताफ्यात २,०८९ बस आहेत. त्यापैकी पीएमपीच्या स्वमालकीच्या ९९१, तर ठेकेदारांच्या १,०९८ बस आहेत. यातील दिवसाला १,७५० बस मार्गावर असतात. त्यातून साधारण १२ ते १३ लाख प्रवासी प्रवास करतात. पुणे, पिंपरी-चिंचवड आणि ‘पीएमआरडीए’च्या हद्दीतील लोकसंख्या पाहता पीएमपीला ३,८०० बसची आवश्यकता आहे; पण सध्या तरी निम्म्याच बस मार्गावर आहेत. लवकरच ठेकेदारामार्फत चालविल्या जाणाऱ्या २६६ बसना १० वर्षे पूर्ण होत आहेत. त्यामुळे त्या बस संचलनातून बाद होण्याची शक्यता आहे. त्यामुळे ताफ्यातील बस कमी होणार आहेत.
पुणे, पिंपरी-चिंचवड आणि ‘पीएमआरडीए’च्या हद्दीत पीएमपीकडून सार्वजनिक वाहतूक सेवा पुरविली जाते. सध्या पीएमपीच्या ताफ्यात २,०८९ बस आहेत. त्यापैकी पीएमपीच्या स्वमालकीच्या ९९१, तर ठेकेदारांच्या १,०९८ बस आहेत. यातील दिवसाला १,७५० बस मार्गावर असतात. त्यातून साधारण १२ ते १३ लाख प्रवासी प्रवास करतात. पुणे, पिंपरी-चिंचवड आणि ‘पीएमआरडीए’च्या हद्दीतील लोकसंख्या पाहता पीएमपीला ३,८०० बसची आवश्यकता आहे; पण सध्या तरी निम्म्याच बस मार्गावर आहेत. लवकरच ठेकेदारामार्फत चालविल्या जाणाऱ्या २६६ बसना १० वर्षे पूर्ण होत आहेत. त्यामुळे त्या बस संचलनातून बाद होण्याची शक्यता आहे. त्यामुळे ताफ्यातील बस कमी होणार आहेत.
करार दहाच वर्षांचा
‘पीएमपी’कडून ठेकेदारामार्फत १,०९८ बस चालविल्या जातात. ‘पीएमपी’कडून ठेकेदारासोबत पहिल्यांदा सात वर्षांसाठी करार केला जातो. त्यानंतर त्यात तीन वर्षांची वाढ केली जाते. दहा वर्षे झाल्यानंतर त्या बस संचलानातून काढाव्यात, असा नियम आहे. १,०९८ पैकी २६६ बसला पुढील तीन ते चार महिन्यांत १० वर्षे पूर्ण होत आहेत. त्यामुळे या बस ताफ्यातून कमी होणार आहेत. त्यामुळे रस्त्यावरील बसची संख्या घटण्याची शक्यता आहे.
बसला १२ वर्षे पूर्ण
पीएमपीने स्वमालकीच्या बस स्क्रॅपमध्ये काढण्याचा कालावधी नुकताच १० वर्षांवरून १२ वर्षे केला आहे. ‘पीएमपी’च्या स्वमालकीच्या ९९१ बसपैकी सव्वातीनशे बसला १० वर्षांपेक्षा जास्त कालावधी झाला आहे, तर दीडशेपेक्षा जास्त बसना १२ वर्षे पूर्ण होत आली आहेत. त्यामुळे त्या बसदेखील ताफ्यातून कमी होण्याची शक्यता आहे. त्यामुळे ‘पीएमपी’ला तातडीने नवीन बसची आवश्यकता भासणार आहे.
१०० बसची खरेदी सुरू
‘पीएमपी’ने तातडीने स्वमालकीच्या १०० सीएनजी बस खरेदीला सुरुवात केली आहे. त्यासाठी निविदा प्रक्रिया राबविण्याची तयारी सुरू केली आहे. त्यासाठीचा निधी दोन्ही महानगरपालिका देणार आहेत; पण तो निधी अद्याप तरी पीएमपीला मिळालेला नाही. त्यामुळे या बस येण्यास आणखी काही महिने वाट पाहावी लागणार आहे.
३०० बस गुलदस्तात
गेल्या तीन वर्षांपासून पीएमपीच्या ताफ्यात सात मीटरच्या ३०० ई-बस येणार असल्याचे बोलले जात आहे. या बस भाडेतत्त्वावर घेण्यात येणार आहेत; पण या बसला प्रतिकिलोमीटर किती दर असावा, यावरून बस खरेदीचा प्रश्न प्रलंबित आहे. या बस मेट्रोला फीडर म्हणून चालविल्या जाणार आहेत; पण त्या बस खरेदीबाबत पुढे काहीही झालेले नाही, तर संचालक मंडळाने आणखी २०० ई-बस भाडेतत्त्वावर घेण्यास मान्यता दिली आहे. त्यात २० डबल डेकर बस भाडेतत्त्वावर घेतल्या जाणार आहेत; पण त्याचीही पुढे काहीही प्रक्रिया झालेली नाही.