कोल्हापूर: मंत्री हसन मुश्रीफ,आमदार सतेज पाटील आणि के पी पाटील यांनी विरोधी गटाचा कंडका पाडत कागल तालुक्यातील बिद्री येथील दूधगंगा वेदगंगा सहकारी साखर कारखान्यांवर आपली सत्ता कायम ठेवण्यात यश मिळवल आहे. त्यामुळे कार्यकर्त्यांमध्ये जल्लोष सुरु झाला असून सत्ताधारी गटाचे नेते के पी पाटील हे मतमोजणी केंद्रावर दाखल होताच त्यांच्यावर गुलालाची उधळण करत कार्यकर्त्यांनी मोठा जल्लोष केला आहे. तर काही उत्साही कार्यकर्त्यांमुळे पोलीस आणि कार्यकर्त्यांमध्ये बाचाबाची चे प्रसंग देखील घडले आहेत.
बंटी, मुश्रीफांच्या जोडीने विरोधकांचा कंडका पडला
बंटी, मुश्रीफांच्या जोडीने विरोधकांचा कंडका पडला
गेल्या महिन्याभरापासून राधानगरी, भुदरगड, कागल, करवीर या चार तालुक्यातील २१८ गावांचे कार्यक्षेत्र असणाऱ्या आणि सर्वाधिक सभासद असलेल्या या कारखान्याच्या निवडणूक अंतिम टप्प्यात आले आहे. मतमोजणी आज सकाळपासून कोल्हापुरातील मुस्कान लॉन येथे सुरू आहे. पहिल्या टप्प्याचे मतमोजणी पूर्ण झाली असून मतदारांनी यंदा देखील सत्ताधाऱ्यांना आपला कौल देत बिद्रीच्या चाव्या पुन्हा के. पी. पाटील यांच्या हातात दिले आहेत. अंतिम निकालासाठी सायंकाळ होणार असली तरी पहिल्या टप्प्यातील मतमोजणीनंतर निकाल स्पष्ट झाला आहे.
चार तालुक्यातील या निवडणुकीला मिनी विधानसभा म्हणून पाहिले जात असल्याने कधी नव्हे ते यंदा ही निवडणूक जिल्ह्यातील मातब्बर नेत्यांना प्रतिष्ठेची झाली होती. विरोधी गटात असलेल्या ए. वाय. पाटील, आमदार प्रकाश आबिटकर, समरजितसिंह घाटगे यांनी जोरदार प्रचार करत सत्ताधाऱ्यांना घाम फोडले होते. मात्र मंत्री हसन मुश्रीफ, आमदार सतेज पाटील यांनी देखील या निवडणुकीत उतरत. आमदार प्रकाश आबिटकर आणि ए वाय पाटील यांच्या परिवर्तन आघाडीचा कंडका पाडत पुन्हा एकदा आपली सत्ता आणली आहे.
विरोधकांनी अतिशय गलिच्छ अपप्रचार केला
सकाळपासून सुरू झालेल्या मतमोजणी दरम्यान परिवर्तन आघाडीचे नेते ए वाय पाटील यांनी मतमोजणी केंद्रात हजेरी लावून परिस्थिती पाहत होते. मात्र प्रत्यक्ष मतमोजणीला सुरुवात झाल्यानंतर सत्ताधारी के पी पाटील यांच्या बाजूने कौल दिसू लागल्यानंतर ए वाय पाटील यांनी मतमोजणी केंद्रावरून काढता पाय घेतला. सत्ताधारी के. पी. पाटील गटाला पहिल्या फेरीत सरासरी ४५९९ आघाडी मिळाल्याने कार्यकर्त्यांनी जल्लोष सुरू केला तर याचवेळी बिद्री कारखान्याचे अध्यक्ष के पी पाटील मतमोजणी स्थळावर दाखल होताच कार्यकर्त्यांनी त्यांना गुलाल लावत जल्लोष सुरू केला. यावेळी बोलताना के पी पाटील यांनी विरोधकांवर जोरदार निशाणा साधला असून विरोधकांनी केलेला दावा हा अतिशय चुकीचा होता.
विरोधकांनी अतिशय गलिच्छ अपप्रचार करत होते. कारखान्याच्या भूमिकेत अडथळा आणण्याचा प्रयत्न विरोधकांनी केला. शिवाय पैशाच्या जीवावर मतदारांना अनेक अमिषा दाखवण्यात आली. मात्र जनता आणि सभासद आमच्यासोबत होते. यामुळे मतदार सभासद हा चिडून उठला आणि ए वाय पाटील यांना उत्तर दिला असे के पी पाटील म्हणाले आहेत.
पोलीस आणि कार्यकर्त्यांमध्ये राडा
सकाळपासून मुस्कान लॉन येथे सुरू असलेल्या मतमोजणी केंद्रावर कार्यकर्त्यांनी गर्दी केली होती जसे निकाल हाती लागतील तसे कार्यकर्त्यांमध्ये जल्लोष पाहायला मिळत होता दुपारनंतर ही गर्दी मोठ्या प्रमाणात वाढली. अशातच काही अति उत्साही कार्यकर्त्यांनी मतमोजणी केंद्रात जाण्यासाठी पोलिसांबरोबर बाचाबाची सुरू केली. या बाचाबाची चे रूपांतर राडा मध्ये झाला. कार्यकर्त्यांनी पोलिसांच्या अंगावर धावून जात बॅरिकेटिंग तोडून आज जाण्याचा प्रयत्न केला. मात्र पोलिसांनी वेळीच खबरदारी घेत या अति उत्साही कार्यकर्त्यांना बाहेर काढले. यामुळे मतमोजणी केंद्र परिसरात काही काळ तणावपूर्ण वातावरण निर्माण झाले होते.