मुंबई : अंधेरी पूर्व-पश्चिमेला जोडणाऱ्या गोपाळकृष्ण गोखले रेल्वे उड्डाणपुलाच्या कामाला मुंबई महापालिकेकडून गती दिली जात आहे. या प्रकल्पाच्या निर्मितीमध्ये १ हजार २७५ टन वजनाचे दोन गर्डर बसवण्यात येणार आहेत. त्यापैकी पहिला गर्डर बसवण्याचे काम शनिवारी मध्यरात्री सुरू केले जाणार असून. रविवारी पहाटेपर्यंत ते पूर्ण होईल. या पुलाचे पहिल्या टप्प्यातील काम १५ फेब्रुवारी २०२४पर्यंत पूर्ण होईल. त्यानंतर अंशत: पूल वाहनांसाठी खुला केला जाणार आहे, अशी माहिती मुंबई महापालिकेकडून देण्यात आली.

सन १९७५मध्ये बांधण्यात आलेल्या गोखले पुलाचा भाग ३ जुलै २०१८ रोजी कोसळून दोन जणांचा मृत्यू झाला होता. रेल्वे हद्दीतील भाग धोकादायक असल्याच्या तक्रारीमुळे त्याचे काम हाती घेण्यात आले. ७ नोव्हेंबर २०२२पासून पूल वाहतुकीसाठी बंद करण्यात आला. गोखले उड्डाणपुलाचे पाडकाम पश्चिम रेल्वे, तर पुलाची पुनर्बांधणी मुंबई महापालिका करत आहे. पूल पुनर्बांधणीचे काम मे २०२३पर्यंत पूर्ण करून किमान एक मार्गिका सुरू करण्याचा प्रयत्न होता. मात्र या कामांना विविध कारणांमुळे विलंब झाला. या पुलासाठी दोन गर्डरची उभारणी केली जाणार आहे. पुलाच्या सुमारे १,३०० टन वजनी गर्डरची उभारणी करणे, गर्डर उत्तरेकडे सरकवणे आणि गर्डर सरकवल्यानंतर तो ७.५ मीटर खाली आणणे आदी कामे करावी लागणार आहेत. पहिल्या गर्डरच्या कामाची जबाबदारी राइट्स या रेल्‍वे मंत्रालयाच्‍या अंतर्गत सार्वजनिक क्षेत्रातील उपक्रमावर सोपवण्यात आली आहे. हे काम शनिवारी मध्यरात्री केले जाणार आहे. त्यानंतर दुसऱ्या गर्डरचे काम करण्यासाठी काही कालावधी जाईल. गर्डरच्या भागांचे (स्ट्रचरल मेंबर्स) फॅब्रिकेशन अंबाला येथील कारखान्यात करण्यात येत आहे. त्यामुळे दुसरा गर्डर दाखल झाल्यानंतर पुढील कामांना गती दिली जाईल.
मुंबईकरांसाठी मोठी बातमी! उद्या मध्य-हार्बरवर ब्लॉक, काही फेऱ्या रद्द, शेवटची लोकल कधी? वाचा वेळापत्रक
दुसऱ्या कंत्राटदारामार्फत मुंबई पालिकेच्या हद्दीतील या पुलाच्या प्रवेश मार्गिकांचे काम ८० टक्के पूर्ण झाले आहे. गर्डर बसवल्यानंतर त्यावर सळयांचे काम करून सिमेंट-काँक्रिटीकरण करण्यात येईल. नंतर अन्य कामे पूर्ण केली जातील. १५ फेब्रुवारी २०२४पर्यंत गोखले पुलाच्‍या पहिला टप्‍प्‍याचे काम पूर्ण होईल आणि त्यानंतर एका दिशेच्या वाहतुकीसाठी तो खुला करणे शक्य होणार आहे, असे मुंबई महापालिकेकडून स्पष्ट करण्यात आले.

अडचणींमुळे विलंब

पूल पुनर्बांधणीचे काम मे २०२३पर्यंत पूर्ण करून किमान एक मार्गिका सुरू करण्याचा प्रयत्न होता. मात्र स्टील पुरवठ्यात उद्भवलेल्या अडचणींमुळे या कामाला विलंब झाला. डिसेंबर २०२३ अखेरीस संपूर्ण पूल खुला व्हावा, यासाठी मुंबई महापालिका प्रयत्नशील होती. मात्र हे उद्दिष्ट गाठणेही शक्य झाले नाही.