म. टा. प्रतिनिधी, नागपूर
१७ दिवस जगाशी पूर्णत: संपर्क तुटलेल्या ४१ श्रमिकांना वाचविण्यात मंगळवारी भारत सरकारला यश आले. या बचावकार्यात येथील वेस्टर्न कोलफिल्ड लिमिटेड (वेकोलि)च्या चमुचेसुद्धा सहकार्य लाभले. या चमूचे नेतृत्व महाव्यवस्थापक दिनेश बिसेन (मायनिंग, बचाव कार्य) यांच्याकडे होते.
१७ दिवस जगाशी पूर्णत: संपर्क तुटलेल्या ४१ श्रमिकांना वाचविण्यात मंगळवारी भारत सरकारला यश आले. या बचावकार्यात येथील वेस्टर्न कोलफिल्ड लिमिटेड (वेकोलि)च्या चमुचेसुद्धा सहकार्य लाभले. या चमूचे नेतृत्व महाव्यवस्थापक दिनेश बिसेन (मायनिंग, बचाव कार्य) यांच्याकडे होते.
उत्तराखंडमध्ये चारधाम प्रकल्पाचा भाग असलेल्या सिलक्यारा ते बारकोट या पाच किलोमीटरच्या बांधकामाधीन बोगद्याचा काही भाग १२ नोव्हेंबरला कोसळला. बोगद्याच्या सिलक्यारा दिशेकडील सुमारे ६० मीटरचा भाग खचल्याने ४१ कामगार अडकले. बोगद्याच्या बांधून तयार असलेल्या २ किलोमीटर भागात हे कामगार अडकले होते. त्यांच्या बचावासाठी गेले १७ दिवस संपूर्ण प्रयत्नांसह प्रयत्न सुरू होते. मात्र, यश थोडक्यात हुलकावणी देत होते. दरम्यान, काही दिवसांपूर्वी तेथे पोहोचलेल्या वेकोलिच्या चमूने बचाव पथकाला तांत्रिक बचावाचे सल्ले दिले.
या चमूच्या तांत्रिक सल्ल्यामुळे सिलक्यारा येथील बचावकार्यात महत्त्वाची भूमिका बजावली. उत्तरकाशीमध्ये विविध विभागातील बचाव चमूंना मजुरांच्या सुरक्षिततेसाठी थांबून अंदाज घेत काम करावे लागले. देशातील अन्य भागातून पाठवलेली यंत्रसामग्री रस्तेमार्गाने सिलक्यारा येथे पोहोचण्यास पावसामुळे विलंब झाला. त्यामुळे बचावकार्यात बरेच अडथळे आले. परिणामत: मजूर अडकलेल्या डोंगरातील वेगवेगळ्या भागासह उभ्या मार्गाने ‘व्हर्टिकल ड्रिलिंग’ सुरू करण्यात आले. पावसामुळे या बचावकार्यादरम्यान व्हर्टिकल ड्रिलिंग करताना अडचणींचा सामना करावा लागला. खोदकाम यशस्वी झाल्यानंतर मंगळवारी रात्री मजुरांना बाहेर काढण्यात आले.
आंतरराष्ट्रीय स्पर्धांमध्येही सहभाग
वेकोलिच्या रेस्क्यू टीमने यापूर्वी २०२२मध्ये कोल इंडिया लिमिटेडकडून अमेरिकेतील वेस्ट व्हर्जिनिआ येथे झालेल्या माइन्स रेस्क्यू कॉम्पिटिशनमध्ये प्रतिनिधीत्व केले आहे. तसेच २०१८मध्ये येकाटरिनबर्गला झालेल्या इंटरनॅशनल माइन्स रेस्क्यू कॉम्पिटिशनमध्ये सहभाग नोंदविला होता. यातील येकाटरिनबर्गमधील स्पर्धेत या चमूला ‘मोस्ट अॅक्टिव्ह रेस्क्यू टीम’ने पुरस्कार पटकावला होता.
बोगद्याचे होणार सेफ्टी ऑडिट
सिल्कियारा येथे झालेल्या अपघातामुळे ४१ श्रमिक बोगद्यात अडकले होते. पीएमओच्या मार्गदर्शनात सुरू झालेल्या या बचावकार्यात सर्व बचाव संस्थांनी रात्रदिवस मेहनत केल्यामुळे सर्व श्रमिकांना वाचविण्यात यश मिळाले. पहिल्यांदाच अशा प्रकारच्या संकटाचा सामना करावा लागला. या अपघातातून बचावलेल्या सर्व श्रमिकांना आणि त्यांच्या कुटुंबीयांना माझ्या शुभेच्छा आहेत. त्यांच्या चांगल्या आरोग्यासाठी शुभकामना व्यक्त करतो. सर्व बचाव संस्थांचे अभिनंदन आणि धन्यवाद देतो. या घटनेमुळे बरेच काही शिकायला मिळाले असून या बोगद्याचे सेफ्टी ऑडिट करण्यात येणार आहे. तसेच अधिकाधिक चांगले तंत्रज्ञान कसे वापरता येईल, याचादेखील विचार करण्यात येईल. हिमालयाची भौगोलिक स्थिती पाहता तिथे काम करणे कठीण आहे. पण, त्यावर उपाय शोधावा लागणार आहे. – नितीन गडकरी, केंद्रीय मंत्री
Read Latest Maharashtra News And Marathi News