तुकूम येथील घरातून १२ हजार रुपयांची रोकड चोरीला गेल्याची तक्रार पाच दिवसांपूर्वी पोलिसांना प्राप्त झाली. त्यानुसार, पोलिसांनी परिसरातील सीसीटीव्ही फुटेजची पाहणी केली असता स्थानिक गुन्हे शाखेत कार्यरत हवालदार नरेश डाहुले हा चोरी करताना आढळल्याने पोलिसांनी त्याला अटक केली. चौकशीत आरोपीने चोरीची कबुली दिली. त्याच्या घरातून चोरीला गेलेली काही रोकडही जप्त करण्यात आली. तसेच त्याने त्याच भागातील अन्य एका चोरीच्या घटनेतही आपला सहभाग असल्याची कबुली दिली. त्यात चांदीच्या मौल्यवान वस्तू तसेच कारचाही समावेश होता, अशी माहिती पोलिससूत्रांनी दिली.

पोलिस दलात १२ वर्षांहून अधिक सेवा असलेला नरेश डाहुले गेल्या दोन वर्षांपासून एलसीबीमध्ये कार्यरत होता. त्याला शनिवारी न्यायालयात हजर केले असता त्याची दंडाधिकारी न्यायालयीन कोठडीत रवानगी करण्यात आली. रविवारी त्याने दुसऱ्या चोरीची कबुली दिल्याप्रकरणी त्याला पोलिसांकडून पुन्हा ताब्यात घेण्यात येणार असल्याची शक्यता सूत्रांनी वर्तवली.