रुग्ण दाखल होणे आणि बरे झाले की त्यांना सुट्टी होणे हा येथील नित्याचाच भाग. त्यामुळे रुग्णांची काळजी घ्यायची आणि विसरून जायचे. नव्या रुग्णाच्या काळजीसाठी धावायचे, हेही नेहमीचेच. पण खुशालच्या जन्मानंतर त्याची मेडिकलमध्ये घेतलेली काळजी त्याचे पालक विसरले नव्हते. मंगळवारी खुशालचा पाचवा वाढदिवस होता. या दिवसाचे औचित्य साधून खुशाल आपल्या आई-वडिलासंह मेडिकलच्या एनआयसीयुमध्ये आला. त्यावेळी त्याला कोणी ओळखण्याचे कारण नव्हते. पण हातात भेटवस्तू घेऊन आलेला बालक पाहून सर्वांनाच आश्चर्य वाटले.

त्याच्या वडिलांनी उपस्थितांना खुशालच्या जन्माची कथा सांगितली. त्यानंतर त्याच्यावरील उपचार आणि डॉक्टर-परिचारिकांनी फिरविलेला मायेचा हात याची आठवण करून दिली. तेव्हा उपस्थितांच्या डोळ्यात आनंदाश्रू दाटले. पाच वर्षांपूर्वी व्हेंटिलेटरवर असलेले बाळ आज त्यांच्या पुढे हाती भेटवस्तू घेऊन उभे होते. मग या बाळाच्या हस्तेच त्याने आणलेल्या भेटवस्तू तेथे दाखल रुग्णांना देण्यात आल्या. या अनोख्या बालक दिनाने मेडिकलचे वातावरण काहीसे भावुक झाले होते.