आम्ही विद्यार्थ्यांची सदस्य नोंदणी करीत असताना आंदोलन करणाऱ्या भाजप आणि अभाविपच्या काही कार्यकर्त्यांनी आमच्या कार्यकर्त्यांना मारहाण केली. जवळपास दहा ते पंधरा जणांनी आमच्या चार कार्यकर्त्यांना लाथाबुक्क्यांनी तुडवले आणि आमच्या हातातून मोबाईल, झेंडा हिसकावून घेतला. साधारण २० मिनिटे हा प्रकार सुरू होता. जातिवाचक शिवीगाळ, महापुरूषांच्या नावाने अर्वाच्च भाषेचा वापर करण्यात आला. महिला कार्यकर्त्यांनाही मारहाण करण्यात आली. याचा निषेध म्हणून आम्ही घोषणा देत असताना झेंडा जाळण्याचा प्रकार घडला, असे घटनेतील श्रावणी बुवा हिने सांगितले.

नवसमाजवादी पर्याय संघटनेच्या कार्यकर्त्यांनी पुणे विद्यापीठात गेल्या तीन दिवसांपासून विद्यार्थी संघटनांमध्ये झालेल्या मारामारीच्या घटनांमधील सत्य परिस्थितीची माहिती पत्रकार परिषदेत दिली. या वेळी घटनेतील काही ध्वनिचित्रफिती दाखविण्यात आल्या. संघटनेचे राज्य सचिव बी. युवराज, आकाश नवले, प्रथमेश नाईक, निहारिका भोसले, श्रावणी बुवा आदी कार्यकर्ते उपस्थित होते.