ॲड.दीपक चटप यांना गेल्या वर्षी ब्रिटीश सरकारने प्रतिष्ठेची ‘चेवनिंग’ शिष्यवृत्ती दिली होती. ज्यामुळे त्यांना लंडनमधील सोएस या जागतिक नामांकित विद्यापीठात कायद्याचे पदव्युत्तर शिक्षण घेतले. या संधीचे सोने करत दीपकने जगभरातील स्कॉलर्सतून आपली छाप सोडली. आदिवासीबहुल चंद्रपूर जिल्ह्यातील गडचांदूर येथील ॲड. दीपक चटप यांनी चंद्रपूर-गडचिरोलीसह राज्यातील सामाजिक प्रश्नांवर केलेले कायदेविषयक रचनात्मक काम समाजाला प्रेरणादायी ठरले आहे. संविधानिक मुल्ये, विधायक धोरणे, ग्रामीण युवकांची शैक्षणिक क्षमता बांधणी, हक्क आणि अधिकाराविषयी कृती युक्त भूमिका दिशादर्शक ठरली आहे.

लंडन येथे उच्चशिक्षणानंतर देश-विदेशात मोठ्या पगाराच्या संधी असूनही शिक्षणाचा उपयोग समाजहितासाठी व्हावा, या हेतूने चंद्रपूर जिल्ह्यात परत येऊन रचनात्मक काम उभे करण्याचा मनोदय त्यांनी व्यक्त केला. वर्षभरात युनायटेड किंग्डम येथील ग्लासगो, बर्मीगम, कार्डीफ आदी ठिकाणी झालेल्या जागतिक परिषदेतील ॲड. दीपक चटप यांचा सहभाग महत्वपूर्ण ठरला. विशेषतः लंडन येथील डॉ. बाबासाहेब आंबेडकर यांच्या निवासस्थानी झालेल्या जागतिक परिषदेत विशेष वक्ता म्हणून ॲड. दीपकने भूमिका मांडली. जगभरातील स्कॉलर्सचे नेतृत्व करत लंडनच्या संसदेत लोकप्रतिनिधी स्कॉलर्स संवाद घडवून आणला. लंडनमध्ये भारतीय लोकशाही आणि आजची आव्हाने यावर परिसंवाद घडवून आणत जगभरातील स्कॉलर्सचे भारताविषयी लक्ष वेधले. अमेरिकेतील अनुदान, जागतिक व्यापार संघटनेची धोरणे आणि भारतातील कायद्यांचा कापूस उत्पादक शेतकऱ्यांवर होणारा परिणाम या विषयावर दीपकने संशोधन केले असून लवकरच ते प्रसिद्ध होणार आहे.