या धडकेने दोघे जण खाली पडले. यावेळी धडक देणारी दुचाकी निघून गेली. मात्र, पाठीमागून आलेल्या तिसर्‍या दुचाकीचे पुढचे चाक डोक्यावरून गेल्याने अभय मेनकुदळे हे जागीच ठार झाले. तर सोपान राऊत हे जखमी झाले. अपघातानंतर प्रत्यक्ष घटनास्थळावरील वाहनधारकांनी तात्काळ पोलिसांना माहिती देऊन रुग्णवाहिका बोलावून घेतली. उपनिरीक्षक गणेश माने हे कर्मचार्‍यांसह घटनास्थळी दाखल झाले. त्यानंतर अभय मेनकुदळे यांचा मृतदेह शवविच्छेदनासाठी उपजिल्हा रुग्णालयात हलविण्यात आला. रात्री उशिरा त्यांचा मृतदेह अंत्यविधीसाठी शिखर शिंगणापूर येथे नेण्यात आला.

या प्रकरणी कोरेगाव पोलीस ठाण्यात अपघाताची नोंद केली आहे. दोन्ही दुचाकीचालक श्रीकृष्ण बंडू सोनटक्के, (रा. भूम, जि. धाराशीव) आणि अभिषेक वसंत भडकवाड, (रा. सुर्डी, ता. बार्शी, जि. सोलापूर) यांना पोलिसांनी अटक केली आहे. उपनिरीक्षक गणेश माने या प्रकरणी तपास करत आहेत. मृत अभय मेनकुदळे यांच्या पश्‍चात पत्नी, एक मुलगा, एक विवाहीत मुलगी, नातवंडे, आई आणि वडील असा परिवार आहे. त्यांच्या अपघाती निधनाने शिखर शिंगणापूरसह कोरेगाव परिसरात शोक व्यक्त केला जात आहे.

अभय मेनकुदळे हे माण तालुक्यातील सामाजिक व राजकीय क्षेत्रात अनेक वर्षे कार्यरत होते. माजी आमदार प्रभाकर घार्गे आणि शिवसेना सातारा जिल्हा संपर्कप्रमुख शेखर गोरे यांचे कट्टर समर्थक म्हणून ओळखले जात. काही काळ त्यांनी प्रभाकर घार्गे यांचे स्वीय सहाय्यक म्हणून त्यांनी काम पाहिले आहे. २०१४ ते २०१९ या काळात त्यांनी पाच वर्षे सरपंचपद भूषविले. कोरेगाव येथील प्रसिध्द किराणा व्यापारी स्वर्गीय अशोक आत्माराम उंबरदंड यांचे ते जावई आणि राजेंद्र तसेच संजय उंबरदंड यांचे मेहुणे होते. त्यांचे शालेय शिक्षण कोरेगावातच झाले असून उत्कृष्ट व्हॉलीबॉलपटू म्हणून त्यांची विशेष ओळख होती.